طريقة عمل الحواوشي البلدي والاسكندراني النهارده هنتكلم عن أكلة من اشهر اكلات الشارع المصري والمشهورة جدا بيها مصر وهي الحواوشي المصري سواء البلدي أو الاسكندراني بطريقة سهلة وطعم اجمل من المحلات.
الحواوشى البلدي
المكونات:
- كيلو لحم مفروم.
- عيش بلدي ابيض او اسمر.
- 3 حبات كبار بصل مفروم او مقطع صغير.
- خمس فصوص ثوم مفرومين.
- حزمة بقدونس اخضر.
- فلفل حار أو حلو.
- معلقتين معجون فلفل احمر لو متوفر.
- معلقة صغيرة ملح.
- معلقة صغيرة فلفل اسود.
- معلقة كبيرة توابل حواوشي.
- نص معلقة صغيرة بهارات مشكلة.
طريقة تحضير الحواوشي البلدي:
- هتقطعي البصل قطع صغيرة أو تفرميه ناعم او اي تقطيعة تحبيها وهتضيفي عليه الفلفل الاسود والملح والبهارات وتوابل الحواوشي وتعجنيهم ف بعض كويس اوي.
- هتضيفي الفلفل المفروم والبقدونس المفروم ومعجون الفلفل واللحمة وهنقلبهم ف بعض لحد م يتجانسو بشكل كامل ويتوزعو مع بعض كلهم.
- هتقطعي الخليط ده لكرات عشان تكون جاهزة لحشو العيش على طول.
- حجم الكرات هيكون حوالي 150 جرام لكل رغيف عيش افتحي العيشه وحطي فيه كرة اللحمة ووزعيها كويس من الطرف للطرف لحد م تبقى مفروده فالرغيف كله.
- هتدهني العيش سمنة او زيت وتكوني مسخنة طاسة اوي وتحطي الرغيف دقيقتين لحد م يتحمص للدرجه اللي تحبيها.
- ممكن تدهني العيش زيت وتحطيه فالفرن يتحمص وهيطلع معاكي بنفس الطريقة.
- خطوة إضافية ودي اختياري تحطي على الحشوة من فوق جبنة مودزاريلا أو شيدر.
- قدميه سخن مع بطاطس وكاتشب وبالف هنا.
ملحوظة:- لو مش متوفر عندك معجون فلفل احمر ممكن تجهزيه بسهولة هو عبارة عن فلفل احمر مشوي وشيلي من عليه القشرة الخارجية واعجنيه وخزنيه في برطمان واستخدميه وقت م تحبي.
الحواوشى الاسكندراني
مكونات عجينه الحواوشي الاسكندراني :
- معلقة كبيرة خميرة.
- معلقة كبيرة سكر.
- معلقة صغيرة ملح.
- معلقة صغيرة بيكنج بودر.
- نص كوبايه زيت.
- اربع كوبايات دقيق متعدد الاستعمالات وممكن تحتاجي نص زياده.
- كوباية ونص حليب دافئ او ممكن تستبدليه ب ميه دافيه.
- اربع معالق كبيرة زبادي.
طريقة تحضير العجينة:
- في طبق عميق هتحطي الحليب او الميه وتحطي معلقة الخميرة ومعلقة السكر وتقلبيهم كويس وسيبيهم عشر دقائق.
- بعد العشر دقايق هتحطي الملح والبيكينج بودر وده بيساعد أن العيش يكون هش شوية.
- هتحطي اربع معالق زبادي بس لازم يكون بدرجة حرارة الغرفة أو دافئ شوية مينفعش يبقى ساقع.
- هتقلبي كويس الخليط ده وتحطي الدقيق بالتدريج لحد م تتكون معاكي عجينه هتلاقيها بتلزق هتحطي نص كوباية الزيت بس على مرتين عشان تعرفي تلمي العجينه هتتكون معاكي عجينة طرية وناعمة وبتلزق شوية بسيطة في ايدك.
- غطيها وسيبيها نص ساعة تخمر ف مكان دافي وتعالي نجهز الحشوة بتاعتنا.
مكونات الحشوة :
- كيلو لحم مفروم .
- بصلتين أو تلاتة كبار.
- فلفل اخضر.
- فلفل حار اختياري حسب الرغبة.
- 5 فصوص ثوم مفرومين.
- بقدونس.
- معلقة كبيرة ملح.
- معلقة كبيرة توابل حواوشي.
- معلقة كبيرة فلفل اسود.
- معلقة صغيرة بهارات مشكلة.
طريقة التحضير :
- هتفرمي كل المكونات دي على الوش الخشن أو قطعيهم.
- هتجيبي العجينة قطعيها كرات بالحجم اللي تحبيه وادهنيها زيت وسيبيها نص ساعة ترتاح ده بيخلي فرد العجينة سهل اكتر.
- بعد م ترتاح العجينة هتفرديها بدقيق أو زيت والافضل زيت وتفضلي افردي فيها لحد م تبقى رقيقة وبالسمك اللي تفضليه.
- هتحطي الحشو وتفرديه على العجينة بس طبقة رفيعة عشان متبقاش زي البرجر.
- هتغطي الخلطة بتاعة الحواوشي بطبقة تانيه من العجين وشديها على الأطراف لحد م تبقى مغطية اللحمة وركزي فالتقفيل عشان متفكش منك وهي بتستوي وكل مجهودك يروح.
- هترفعي طرف العجين اللي تحت وبصباعك تلزقيه في طرف العجينة اللي فوق لناحية جوة عشان لما تقلبيها متبانش أنها عجينة مقفولة على بعضها ويكون شكلها متساوي ومبتتفتحش منك.
- في اختيارات كتير لدهن وش الحواوشي منها صفار البيض او مية ونسكافيه أو زيت بس اجمل وعن تجربة هو السمنة هتدهني الطبقة الأخيرة دي سمنة وتقلبي العجينة على الناحيه التانيه بحيث أن آثار تقفيل العجينة يكون من تحت.
- هتدهني الوش زيت وترشيحبة البركة وسمسم وده اختياري وتدخليه الفرن على الرف الاوسط وشغلي الشواية ياخد لون بعدها شغلي الفرن من تحت بس خلي بالك تكوني مسخنة الفرن كويس قبل م تحطي الحواوشي هتفرق فالنتيجة.
الحواوشي البيتزا وده من أنواع الحواوشي الاسكندراني
هنمشي بنفس المكونات والخطوات بس بدل حبة البركة والسمسم هنحط على الوش من فوق ميكس جبن مبشورة وحلقات فلفل وطماطم بس شيلي قلب الطماطم عشان متنزلش المية بتاعتها ويبوظ مننا الحواوشي ونكمل تسويته وقدميه مع بطاطس وكاتشب وبالهنا.