طريقة عمل الرز المعمر الحلو والحادق -->
U3F1ZWV6ZTM3NjA3Mjc2MDg1X0FjdGl2YXRpb240MjYwMzg1NTExOTQ=
recent
أخبار ساخنة

طريقة عمل الرز المعمر الحلو والحادق

 

طريقة عمل الرز المعمر

طريقة عمل الرز المعمر 


الرز المعمر من اكتر الاكلات شعبية في مصر واللي مشهورة بيها مصر في العالم كله واللي بيتميز بسهولة تحضيره وطعمه الجميل جدا وفي منه انواع زي الرز المعمر الحلو والحادق .

الرز المعمر الحلو

المكونات :

  • ٤ كوب رز.

  • ٤ كوب لبن.

  • ٢ معلقة سمنة بلدي. 

  • علبة قشطة أو خمس معالق من قشطة اللبن.
  • ٢ علبة زبادي.

  • ٢ كوب مياه .

  • كوباية سكر ودي حسب رغبتك.
  • فانيليا.
  • زبيب وجوز هند ودي خطوة اختيارية وبالكمية اللي تحبيها.

طريقة تحضير الرز المعمر الحلو

  • اغسلي الرز كويس لحد م تبقى الميه بتاعته شفافة وانقعيه لمدة ساعة ونص.
  • هتصفي الرز كويس من المية وتحطيه في صينية وتحطي معاه معلقة السمنة ومعلقة قشطة وقلبيهم كويس لحد م الرز يتغلف بالسمنة والقشطة.
  • هتحطي اللبن والميه والفانيليا والسكر وتخلطيهم مع بعض كويس.
  • ونضيفي الخليط ده مع جوز الهند والزبيب بهدوء على الرز عشان الرز ميتكتلش ف مكان اكتر من التاني.
  • هتقلبي علبتين الزبادي وتضيفيهم على الرز فالاخر.
  • هتحطي فوق الوش باقي القشطة وتدخليه الفرن في الرف الاوسط وشغلي الشواية الاول يغلي وياخد لون عشان الوش يبقى كريمي وبعدها حطيه في اخر رف من تحت واطفي الشواية وشغلي النار من تحت على درجة حرارة هادية من ربع لتلت ساعة لحد م يستوي.

وبكده جهزنا الرز المعمر الكريمي الجميل بس خلي بالك من خطوات التسوية عشان لو حطتيها فالرف اللي تحت الاول بعدين حطتيه تحت الشواية الرز هيتشرب الزبادي والقشطة وهيبقى ناشف من الوش.

الرز المعمر الحادق

الرز المعمر الحادق

الطاجن ده ممكن تقدميه جنب حاجات كتير سواء فراخ او لحمة سواء مسلوقة أو مع( بصل مكرمل )👈 وده بصل مقطع شرايح ومتحمر مع معلقة سكر وزيت لغاية مايبقى لونه بني ، او كبد وممكن تحطي معاه حمام.

المكونات:

  • أربع كوبايات رز.
  • اربع كوبايات لبن.
  • كوبيتين ميه.
  • نص معلقه سكر.
  • معلقة كبيرة ملح.
  • علبة قشطة.
  • معلقتين سمنة.
  • علبتين زبادي.

طريقة تحضير الرز المعمر الحادق

  • هتغسلي الرز لحد م تبقى ميته نضيفه ومفهاش أي شوائب وتنقعيه لمدة ساعة.
  • هتحطيه ف صينيه او طاجن وتقلبيه مع السمنة ومعلقة قشطة لحد م تغلفي كل كمية الرز بالسمنة والقشطة.
  • هتقلبي السكر والملح في اللبن مع بعض عشان يتوزعو كويس وتحطيهم على الرز.
  • هتقلبي الزبادي عشان يبقى شبه سائل وتحطيه بعد م تحطي اللبن وتفرديه على الوش كله.
  • هتحطي باقي كمية القشطة على الوش وتخلي بالك من التسوية زي م اتفقنا نحطه فالرف الأوسط ونشغل الشواية يغلي وياخد لون الاول بعدين هنحطه في الرف الاخير من تحت ربع ساعة لحد م يستوي عشان يبقى مكون وش كريمي.

طب لو عايزة تحشيه بفراخ او لحمة هتعملي اي؟؟؟

هتعملي خلطة الفراخ أو اللحمة اللي بتفضليها وهتخلطي الرز والسمنة ومعلقة القشطة مع بعض هتحطي نصهم فالطاجن من تحت وهتحطي الخلطة وتنزلي بباقي كمية الرز اللي معانا.

هنحط خليط اللبن بالسكر والملح وبعدها هننزل بعلبتين الزبادي ونحط من فوق الوش القشطة ونسويه بالطريقه اللي اتفقنا عليها.

الاسمبريد إلكترونيرسالة