العناد عند الاطفال ، الانواع والعلاج -->
U3F1ZWV6ZTM3NjA3Mjc2MDg1X0FjdGl2YXRpb240MjYwMzg1NTExOTQ=
recent
أخبار ساخنة

العناد عند الاطفال ، الانواع والعلاج

العناد عند الأطفال ، الأسباب والعلاج

العناد عند الأطفال ، الأسباب والعلاج

العناد يعني النزاع حول مسألة معينة او راي ما ، ويوصل العناد ان الشخص ممكن يخرج عن القوانين او يكسر الضوابط المحددة او الخروج على ما ينبغي الالتزام به ، والعناد صفة سلبية وللأسف موجود عند معظمنا.

انواع العناد

  • العناد الطبيعي : وبيكون من سن سنتين الى 7 سنين يعني سن حضانة ، وغالبا العناد ده بيكون دليل على قوة الشخصية والاستقلالية ، واللي مش بيملك هذا النوع ، ممكن لما يكبر يكون شخص انطوائي او شخصيته الى حد ما مسالمة او فيه نوع من الجبن .

  • العناد المتكرر : وده نوع مرفوض تربويا واجتماعيا والنوع ده اللي غالبا معظم الامهات بيعانوا منه ، وبيبقى في شكل رفض تام للاوامر او التعليمات مع اسباب غير مقنعة بالمرة

  • العناد المرضي : وده نوع نادر جدا وبيحتاج اخصائيين نفسيين للتعامل معه وبيكون مرافق للامراض النفسية او العصبية .

العناد عند الاطفال

معظمنا للاسف بيعتقد ان العناد صفة جوة الطفل بيتولد بيها ، وده مش حقيقي ، لكن الحقيقة ان العناد خاصة لو زاد عن حده بيكون مؤشر او انذار لينا كاباء وامهات ، ان فيه خلل معين في نفسية الطفل ، يعني نهتم بالموضوع ونشوف الخلل فين عشان نعالجه .

اسباب العناد عند الاطفال :

فيه اسباب كتيرة جدا بتحول الطفل لشخص عنيد ، هنذكر بعضها على سبيل المثال :👇

  • محاولة الطفل اثبات ذاته

  • استبداد الاب والام وتدخلهم في كل كبيرة وصغيرة في حياته ، ومش بيسيبوا أي مساحة لخصوصياته

  • اعطاء الاوامر للطفل بشكل سلبي وبصورة مستمرة

  • معاملة الطفل معاملة جافة سواء من والديه في البيت او مدرسينه في المدرسة ، وبكدا مفيش أي مناخ فيه احتواء او اهتمام

  • عقاب الطفل بشكل قاسي وغير تربوي

  • عناد الاب والام نفسهم بيكون سبب كبير في ان الطفل يقلدهم ويعمل زيهم

  • مقارنة الطفل بأخوته او زملاءه مما يؤثر بالسلب عليه وعدم ادراك الوالدين وجود الفروق الفردية عند الاطفال

  • التدليل الزائد واستجابة الوالدين لمطالب الطفل عند عناده مما يعزز هذا السلوك واللجوء اليه كل ما يحتاج حاجة

  • وسائل الاعلام ايضا لها دور كبير في تعزيز وتقوية سلوك العناد خاصة لو الطفل متابع برامج فيها عنف

العلاج

 

فيه قواعد معينة وضعها التربويون او اخصائي تربية وعلم نفس في التعامل مع الطفل العنيد والقواعد دي لو اتبعت بإتقان وحكمة ممكن تخلصك من هذا السلوك نهائيا  :

  • اول قاعدة : لازم قبل ماعالج الطفل اعالج نفسي كاب او ام وبعد كدا اقدر اطبق باقي القواعد ، بمعنى لو انا عنيد بطبعي وده بيظهر قدام الطفل وانا بتناقش مع الطرف الاخر ، يبقى مش هنقدر نطبق أي قاعدة مهما كلفك من وقت ومجهود ، لاننا مرايا اطفالنا وهما بيعملو اللي بنعمله قدامهم مش اللي بنقوله لهم

  • تاني قاعدة : اخد بالي وانا بكلم الطفل وده بشكل عام سواء كان طفل عنيد او طفل عادي ، بمعنى اني لازم اكلمه بصوت هادي وانزل على ركبتي لو الطفل اقصر مني بكتير ، ماكلموش من فوق ، لازم ابص في عينيه واكلمه كصديق او حد ناضج واتناقش معاه بشكل موضوعي جدا

  • تالت قاعدة : اراعي نفسية الطفل واعرف ايه اللي يبسطه واحاول بقدر الامكان اخصص له وقت يومي العب معاه او اشاركه دنيته البسيطة ، ده ليه دور كبير جدا في تعزيز السلوك الايجابي عنده

  • رابع قاعدة : اتحلى بالحكمة واكون عارف امتى اكون حازم وامتى اكون حنين ، واحاول ماخنقوش باوامر كتير ملهاش لزمة ، يعني مثلا اختيار اللبس خليه على ذوقه هو مش ذوقي انا ، وناخد بالنا الحزم الشديد مش بس ممكن يخلق شخص عنيد ، لا ده ممكن كمان يخلق شخصية ضعيفة مستسلمة لأوامر الاكبر منها ومش هيعرف يأخذ أي قرار في حياته لكن يستناك انت تختار له زي ما عودته من صغره

  • خامس قاعدة : تشجيعه ومدحه لما يعمل حاجة كويسة فعلا تستحق المدح واعطاءه مكافأة بسيطة نتيجة العمل ده ، بس ناخد بالنا مش هنفضل طول الوقت نمدح ، كدا لو جه مرة عمل حاجة حتى لو بسيطة وملقيش مدح هيصاب باحباط ويبطل السلوك ده ، فنخلي المدح مقنن ومعقول وعلى السلوك اللي فعلا يستحق عليه المدح والتشجيع في الاستمرار ، مثلا لو جه من المدرسة هيحط الشنطة مكانها وقلت برافوووو ، وبعدها حط اليونيفورم مكانه ، وبرضه قلت برافوووو، وبعدها راح غسل ايده عشان ياكل فقلت برافوووو ، كدا كلمة برافووو فقدت طعمها وقيمتها ، لان السلوك ده طبيعي يعمله اول مايرجع من المدرسة فبدل برافو كل شوية نخليها مثلا( جميل انك عملت كدا ) ، لو اداك كباية مياه نقول اشكرك  ، عشان لما يجي فعلا يعمل حاجة كبيرة يستحق كلمة برافووو

  • سادس قاعدة : بلاش اديه اكتر من امر في نفس الوقت ، نخلي الاوامر بعيد عن بعدها وتكون بسيطة ، مثلا انا عايزه يغسل ايده وياكل اكله كله ، ويحط شنطته مكانها ، واليونيفورم مكانه ، ويرتب العابه ، ويعمل الواجب بتاعه ،.........الحاجات دي كلها لو قلتهاله مرة واحدة مش ممكن ينفذها لانه اصلا هو طفل عنيد فانت بتحمله فوق طاقته وكلمة حاضر صعب جدا يقولها هنا ، فنحاول نرتب الاولويات ، نبدا مثلا نساله حبيبي حمدالله على السلامة ، فيه حاجة هتعملها قبل منحضر الغدا ؟ هو هيقوللك بفى على اللي المفروض فعلا يتعمل بس هتبقى جات منه هو فيرتب مكان الشنطة واليونيفورم وكمان هيروح يغسل ايده ، بعد الغدا هتتفق معاه انه بعد مايخلص لعب يحب يرتب العابه ازاي ؟ مش اقولله رتب العابك ، لا خليها كمناقشة وهو اللي يختار الطريقة

  • سابع قاعدة : لازم اركز اني بتعامل مع شخص ذكي واحترم ذكاءه ومشاعره ، وماقولش كلمة (انت عنيد ) دي ابدا لانها هتقوي صفة العناد عنده ، وهتضيع تعبك في العلاج.

  • ثامن قاعدة : لازم الاب والام يكونوا متفقين على المسموح والممنوع مش اجي قدام الطفل اتناقش وانا اقول حاجة والطرف الاخر يرفضها ، ده هيخلق مشكلة وخلل في نفسية الطفل ، وهيكون صعب علاجه.

  • تاسع قاعدة : لو عايز الطفل يساعدني في مثلا شغل المطبخ او التوضيب ، بلاش اديله امر مباشر ، اخليها ازاي ؟ 

اختيارين ، مثلا : حبيبي تحب توضب السرير الاول ولا نطبق الغسيل ؟ فهو هيختار حاجة ويعملها وبكدا تبقى نجحت .

كمان في الاكل لو هو مصمم على اكلة مش صحية وانت مصمم على اكل تاني هتعمل ايه ؟ هنقوله اختار بين اكلتين انا عاملاهم في البيت فراخ ولا مكرونة بشاميل لكن مش سندويتشات من الشارع ايه رايك ؟ هو هيضطر يختار من الاكلتين خاصة لو عارف انه مهما صمم وعاند انت مصمم كمان على رايك .

اخر حاجة عايزين نتاكد تماما ان تربية الاطفال من اصعب المهام اللي هنقابلها في حياتنا ، بس اعرف كويس ان الطفل زرعة ونوع جيد جدا ، بقدر اهتمامك بيها هتطلعلك نتيجة هايلة وقادة رائعين في المستقبل .

الاسمبريد إلكترونيرسالة