طريقة عمل الكبيبة المقلية المقرمشة (الكبة)
الكبة أو الكبيبة المقليه اغلبنا بيشوف أن هي صعبة بس هي على عكس كل التخيلات هي سهلة جدا بس المهم
نمشي على الخطوات بالترتيب وهتطلع معانا كبة مقرمشة ومحافظة على شكلها وبطعم جميل جدا .
المكونات:
للحشو :
- كيلو لحم مفروم.
- حبتين بصل كبيرة مفروم ناعم.
- معلقة صغيرة زيت.
- معلقة كبيرة سبع بهارات.
- معلقة صغيرة ملح.
- نص معلقة فلفل اسود.
- اي نوع مكسرات وده اختياري.
طريقة التحضير:
- اول حاجه هنجهزها هي الحشوة عشان هنحتاجها باردة خالص.
- هتجيبي البصل المفروم ناعم وتصفيه من اي ميه وتحطيه في طاسة على النار مع معلقة صغيرة زيت وأول م يدبل هتحطي اللحمة ولما تقرب تستوي هنحط التوابل بتاعتنا(معلقة كبيرة سبع بهارات معلقة صغيرة نعناع مجفف نص معلقة صغيرة فلفل اسود ومعلقة صغيرة مليانة ملح).
- هتقلبيها لحد م تستوي و صفيها من اي دهون موجودة فيها والخطوة الاختيارية انك تضيفي مكسرات وحطيها على جنب تبرد.
كده جهزنا الحشوة وهنجهز مع بعض الغلاف الخارجي للكبيبة المقلية.
المكونات :
- كيلو لحم احمر خالي من الدهون اد م تقدري.
- كيلو برغل ابيض مغسول كويس.
- بصلة كبيرة.
- معلقة كبيرة معجون فلفل احمر لو متوفر.
- معلقة كبيرة السبع بهارات.
- معلقة كبيرة كمون.
- معلقة كبيرة ملح.
- نص معلقة صغيرة فلفل اسود.
- مكعب مرقة.
- معلقة توابل الشرق من عند العطار لو مفيش عادي.
- مكعبات ثلج.
ملحوظة:-
لو تحبي الطبقة الخارجية تكون مقرمشة اوي خلي البرغل ضعف كمية اللحمة .
طريقة التحضير :
هتحسي ان طريقة التحضير كبيرة بس بالترتيب هتلاقي نفسك حفظتيها بسرعة
- هتكوني حاطه اللحمة فالفريزر تكون متماسكه شوية بس وحطي معاها مكعبين أو تلاته ثلج وافرميها فرم ناعم يفضل فالكبة لحد م تبقى شبه المعجون .
- هنغسل البرغل ونصفيه بنسبة 90 فالمية وهتضيفي عليهم اللحمة اللي فرمناها كويس.
- هنضيف بصلة متقطعة وخمس فصوص ثوم.
- هتحطي عليهم معلقة كبيرة السبع بهارات ومكعب المرقة معلقة كبيرة توابل الشرق ومعلقة كبيرة كمون ومعجون الفلفل الاحمر والملح.
- هناخد الخليط ده ونفرمه اربع مرات في مفرمة اللحمة على أنعم درجة أو المتوفر عندك وعشان تحافظي على قوام الخليط هتضيفي 3 مكعبات ثلج بعد كل مرتين فرم وفي كل مرة فرم هتضيفي معلقتين ميه باردة.
- بعدها هناخد الخليط ونعجنه كويس اوي لحد م يتداخل مع بعض بشكل كامل.
- لو لقيتي العجينه يابسه وتقيله وصعب فالتشكيل هترشي رشة ميه باردة لحد م تلاقي قوامها طري وبتتشكل بسهولة من غير م يبقى فيها تشققات.
- لو العجينه معجنه ولما تمسكيها بأيدك تلاقيها بتلزق رشي عليها معلقة دقيق هتظبط معاكي وقوامها هيبقى مناسب.
- هنحط جنبنا طبق عميق فيه ميه ساقعة وقطع تلج وحطي ايدك فيه عشان تعرفي تشكيل الكبة وتحافظي على قوامها.
- هتجيبي العجينه وتاخدي منها كرة الحجم اللي يناسبك واعمليها شبه الصباع وتبلي صباعك ميه وتبدأي تعملي تجويف وحركي صباعك بحركة دائرية بعدها بلي صباعك تاني وكف ايدك ولفي بشكل دائري عكس الاتجاه الأول لحد م تخلي حواف الكببيبة رقيق.
- هتحطي فيها الحشوة وتقفليها بالشكل اللي تحبيه.
- بعد م تقفليها بلي صباعك ميه تاني ومشي على الكبيبة بهدوء عشان لو في اي نتوءات أو اي تشققات تتقفل.
- هتخلصي كل الكمية بالشكل ده بس خلي بالك لازم تبلي ايدك بين كل واحده والتانية وتكرري الخطوات بنفس الترتيب.
- وتسيبيها ترتاح نص ساعة فالتلاجة قبل القلي.
- هتحطي طاسه أو حلة على النار وفيها كمية زيت وفيرة وتخليها تسخن على درجة حرارة متوسطه وحطي الكبيبة فيها واستني دقيقه قبل التقليب.
- الكبة المقليه الصحيحة مبتفكش ومبتتفتحش منك فالزيت وبتاخد وقتها فالقلي لو لقيتيها اتقلت بسرعة تأكدي أنها هتكون معجنة من جوة.
طب لو عايزه
تعملي كمية واخزنها فالفريزر عشان عزومة أو ليوم تكوني مشغولة فيه؟؟
هتسيبيها تبرد خالص وحطيها فالفريزر بس يكون في تباعد بينهم عشان ميتعجنوش مع بعض وبعدها احفظيهم ف كيس وممكن تخزنيهم بالشهور بس خلي بالك لما تحبي تقليهم هتحطي عدد صغير عشان الزيت بيتأثر بدرجة حرارة الكبة.