![اشهر انواع الخبز وطريقة صنعها في المنزل اشهر انواع الخبز وطريقة صنعها في المنزل](https://blogger.googleusercontent.com/img/b/R29vZ2xl/AVvXsEjAWYQMlGtOKb_Wur-qWQWqwXUj_oI2LhBjbB4OQNCShkbS6BMMipSDjz68asBjDt6FR481-loj4TyKp9Gq9xanRmW3vcowFozAZnOqdsVtQjl-2Kd4sMYGw9urGM4SVpJC8m1RtU-Nj-4U/s16000/%25D8%25B7%25D8%25B1%25D9%258A%25D9%2582%25D8%25A9+%25D8%25B9%25D9%2585%25D9%2584+%25D8%25A7%25D8%25B4%25D9%2587%25D8%25B1+%25D8%25A7%25D9%2586%25D9%2588%25D8%25A7%25D8%25B9+%25D8%25A7%25D9%2584%25D8%25AE%25D8%25A8%25D8%25B2.png)
اشهر انواع الخبز وطريقة صنعها في المنزل
الخبز اساسي في كل بلدان العالم وتكاد لا تخلو سفرة او طبلية من سلة الخبز ، ويوجد اكتر من 140 نوع من الخبز على مستوى العالم ، منه المسطح ، والمفرود ، والمنفوخ ، يوجد اللي بخميرة بيرة ، او فورية ، او صودا ، ويوجد اللي بدون خميرة خالص ، كمان الخبز مش كله بيتخبز من القمح زي ممتعودين عندنا في مصر ، فيه اللي بيتعمل من الذرة او اشوفان او انواع كتيرة جدا تانية من الحبوب .
في المقال ده هنعرف مع بعض كام نوع من الخبز وطريقتهم نقدر نعملهم في البيت بمكونات موجودة عندنا
خبز التورتيلا
![خبز التورتيلا خبز التورتيلا](https://blogger.googleusercontent.com/img/b/R29vZ2xl/AVvXsEjkccfdAyMdTZ5VGOiw6pslXmxqhfhQ8_7jvjG3amkQMgwx6caBk5DOWmvo6cY-GUkmFzACSJnYYG5Lx-mxqS5ncuUyVQVA3Y4v8VE2BMf_VG2pBV8EwshTQ6qP75VZnPNBy4Tt4RzeR98u/s16000/%25D8%25AE%25D8%25A8%25D8%25B2+%25D8%25A7%25D9%2584%25D8%25AA%25D9%2588%25D8%25B1%25D8%25AA%25D9%258A%25D9%2584%25D8%25A7.png)
النوع ده من اقدم انواع الخبز في العالم تقريبا ، اتصنع اول مرة في المكسيك من حبوب الذرة وبعد كدا ادخلوا الاوربيون القمح الى امريكا وصنعوا منه التور تيلا ، والتور تيلا مشهور وي في اطباق البورينو والتاكو والفاهيتا ، عندنا في مصر بنسميه خبز الشاورما لانه مناسب جدا لسندويتشات الشاورما عن الانواع التانية من الخبز .
تعالوا نعرف مكوناته وطريقته :
المقادير :
- 4 كبايات دقيق
- كباية لبن حليب
- نص كباية زيت
- نص معلقة ملح
- نص معلقة سكر
- نص معلقة بيكنج بودر
الطريقة :
- هنجيب الوعاء اللي هنعجن فيه وننزل بالدقيق والملح والسكر والبيكنج بودر والحليب والزيت ، ونبدا العجن .
- احنا كدا نزلنا بكل المكونات مرة واحدة ، بدون أي تفاصيل طويلة ولا تعب ليكي ، لو حسيتي ان العجينة سميكة معاكي وعايزة تطريها شوية ، ممكن تضيفي حبة مياه وتكملي عجن ، هتحصلي على عجينة ناعمة .
- الخطوة اللي بعدها انك هتقطعيها كور صغيرة ، تقريبا هيبقوا 15 كرة .
- هتسيبيهم يرتاحو 10 دقايق وبعدها تبدئي تفرديهم واحدة واحدة باي طريقة متوفرة عندك ، سواء نشابة او مكنة شعرية او أي طريقة تحبيها ، المهم هتحوليها لفطيرة رقيقة جدا لحد متخلصي كل الكمية
- هتيجي عند الطاسة وترفعيها على النار وتنزلي بالفطاير بتاعتك بشويش فطيرة فطيرة وتقلبيها على الجنبين واللي يخلص ترصيه في طبق بوسع الفطيرة ، وترصيهم كلهم فوق بعض لحد متخلصي الكمية ، بكدا انتي عملتي التورتيلا وهيكون جاهز لأي نوع من السندويتشات او الحشو .
خبز الكريب
![خبز الكريب خبز الكريب](https://blogger.googleusercontent.com/img/b/R29vZ2xl/AVvXsEhwOjhy6qSUKJUf_U8NgWsQPLSqhbE4v7IlX-3v6S0rfdBEo7OdyF3EksJy9jnswEAyN4hLt52ERH4qb8KUYMiT5f8ej5zauMIsJ2mKPyA5cJ5ugS86gxXKS6VzZQmRd-CfJMDzf5XDIBLu/s16000/%25D9%2583%25D8%25B1%25D9%258A%25D8%25A8.png)
كلمة كريب بالفرنسية معناها فطيرة واول مرة اتعملت كانت على ايد شاب فرنسي في اواخر القرن 19 ، الكريب مليان عناصر غذائية لاحتواءه على الحليب والبيض ، وبيستوي في طاسة مدهونة خفيف اوي بمادة دهنية .
المقادير :
- كباية دقيق
- كباية حليب
- 4 بيضات
- 4 معالق زبدة او زيت
- معلقة صغيرة ملح
- معلقة صغيرة سكر
الطريقة :
- هننزل بكل المكونات دي في الخلاط العادي ونضربهم كويس ، هتحصلي على عجينة شبه عجينة الكيك او اطرى شوية
- هتجيبي طاسة غير قابلة للزق ، وتمسحيها بمنديل مدهون زيت ، وتنزلي بحبة من العجين في مغرفة عندك عشان تعرفي توازني في الاحجام ، وتستني اول نتحسي انه هياخد لون ، هتقلبيه الناحية التانية ، وهتعملي كدا في باقي الكمية لغاية متخلصي ، ويكونوا جاهزين لاي حشو سواء حلو او حادق .
الخبز الفرنسي ( الباجيت )
![الخبز الفرنسي ( الباجيت ) الخبز الفرنسي ( الباجيت )](https://blogger.googleusercontent.com/img/b/R29vZ2xl/AVvXsEj4709SPXa2shdneoVxAV4QufERCccMOyquF4wZujucurnzCzfTX9AHnaiZ_ZMEF4tqmx7CXllvp459g-dBFjqC16sxSUTW1lcbxSR0U4ItWcPeG7Un2VtBoEInUTr5YExbjCwdUQjN2FRv/s16000/%25D8%25A7%25D9%2584%25D8%25AE%25D8%25A8%25D8%25B2+%25D8%25A7%25D9%2584%25D9%2581%25D8%25B1%25D9%2586%25D8%25B3%25D9%258A.png)
الخبز ده بداياته يقال انها كانت من فرنسا ، كمان صنع بالشكل ده بالذات عشان يكون سهل وضعه في جيوب العساكر اثناء الحروب .
المقادير :
- كيلو دقيق فاخر
- كوباية مياه دافية
- معلقة صغيرة ملح
- معلقة كبيرة سكر
- معلقة كبيرة خميرة فورية
الطريقة :
- في أي اناء عندك ، هتجيبي المياه والسكر والملح والخميرة والدقيق وتخلطي كله مع بعضه وتعجني كويس اوي ، لغاية متوصلي لعجينة لينة سهلة التشكيل.
- هتغطي العجينة لمدة ساعة او لغاية ما حجمها يتضاعف ، وفيه راي انك تسيبي العجينة ليلة كاملة في التلاجة .
- بعد كدا هنجيب العجينة ونمدها او نفردها ونقطعها مستطيلات .
- هنلف كل مستطيل حوالين نفسه ، وبالسكينة هتعملي خطوط على كل باجيت
- هنرص المستطيلات دي في صينية مدهونة بزيت او زبدة او تكوني مستعملة ورق زبدة .
- وتسيبيها ساعة عشان ترتاح قبل متخبزيها
- هنجيب صفار بيضة وتضربيها كويس في طبق وتدهني وش كل المستطيلات اللي عندنا قبل مندخلها الفرن مباشرة
- هنكون مسخنين الفرن على نار متوسطة وندخل صينية الباجيت لمدة من ربع ساعة الى نص ساعة
- هنخرجها من الفرن بعد متستوي وتسيبيها تبرد وتقطعيها براحتك.
الخبز الايطالي الريفي
![الخبز الايطالي الريفي الخبز الايطالي الريفي](https://blogger.googleusercontent.com/img/b/R29vZ2xl/AVvXsEg0KxCWlbccHdqjUPxcoGGvqfS4jvmDmoaaocbZhGHqHnDs2-uj6vWxWZZ83tcIfSf7J7AA6iRO7JWuPhxdpmtc46BUZUjWI4pPYUVLgHCmLz23XV6uYKFTSrJSjWvULbEcT-PnlFDC1vlG/s16000/%25D8%25A7%25D9%2584%25D8%25AE%25D8%25A8%25D8%25B2+%25D8%25A7%25D9%2584%25D8%25A7%25D9%258A%25D8%25B7%25D8%25A7%25D9%2584%25D9%258A.png)
يهتم الايطاليين بالخبز وانواعه مثل اهتمام العرب به
ويوجد انواع كثيرة من الخبز في ايطاليا مثل ( التارلي ، والساتشينا ، والشاباتا ، والفوكاتشيا ، والبانيتوني ، وغيرها كتير من انواع الخبز الايطالي ) .
هنحضر مع بعض الخبز الايطالي الريفي وده ابسط انواع الخبز الايطالي في المكونات والتحضير
المقادير :
- 3 كبايات دقيق
- كباية مياه
- 2 بياض بيض مخفوقين
- معلقتين كبار زيت
- معلقة صغيرة ملح
- معلقة صغيرة سكر
- معلقة خميرة فورية
الطريقة :
- هتحضري اناء للعجن ، وتجيبي المياه والخميرة والملح والسكر والزيت وبياض البيض وتحركي الخليط وبعدها نضيف الدقيق ونعجن كويس لغاية منحصل على عجينة لينة وطرية .
- هنغطي العجينة لمدة ساعة مثلا او لغاية ميتضاعف حجمها.
- هنجيب صينية وندهنها زيت ونشكل العجينة دي على هيئة رغيف بيضاوي او مدور ونسيبه في الصينية ساعة كمان.
- هنسخن الفرن وقبل مندخله الفرن مباشرة هنجيب سكينة ونعمل كام علامة او فتحة على العجينة من فوق.
- بعد ما يستوي هتخرجيه من الفرن وممكن تقدميه وهو سخن .