طريقة عمل الكشري المصري

موضوعنا النهاردة هنعرف سر عمل الكشري المصري فى البيت زي المطاعم بالظبط وكمان اجمل وانضف من حاجة بره بكتير ، وكمان دقة الكشري والصلصة والبصل المحمر المقرمش هنتعلم كل ده بطريقة سهلة و بسيطة وبشكل مرتب .

اهم حاجه عايزين نمشي على الخطوات بالترتيب عشان نخلص الكشري ف اسرع وقت وبأقل مجهود.

طبعا احنا عندنا اكتر من مكونات ، ياريت تركزي معايا لو اول مرة تعملي كشري، لازم تكوني عارفة انك هتحتاجي اكتر من حلة ، وكمان كل حاجة تخلصيها ، ابعديها عنك عشان متتوهيش في الخطوة اللي بعدها .

دلوقتي تعالي نعرف مكونات الحاجة اللي هتستوي على النار علطول :

المكونات

• نص كيلو رز

• ربع كيلو شعرية

• ربع كيلو عدس

• ربع كيلو حمص  مغسول ومنقوع لمدة ساعتين على الاقل

•  كيلو مكرونة مشكلة 

• ملح

• فلفل

دي المقادير الاساسية جهزيهم كدا قدامك وميكونش فيه اي حاجة ناقصة 

تعالى نشوف هنعملهم ازاي وبعد كدا نكمل باقي الخلطات بتاعة الكشري

 الطريقة

• اول حاجة ، هتجيبي الحمص المنقوع وتغسليه كمان مرة وتحطيه في حلة وميا وترفعيه على النار 

• تاني حاجة هتغسلي العدس كويس وهو كمان تحطيه في حلة مع مياه وترفعيه على النار 

• تالت حاجة تجيبي حلة كبيرة تكفي كمية المكرونة وتحطي فيها اكتر من نصها مياه وحبة ملح ومعلقة خل وترفعيها على النار ولازم تكون بتغلي قبل متنزلي فيها المكرونة اوع تنسي النقطة دي

• رابع خطوة هنجيب الرز ونغسله وننشفه ونروح في حلة فيها حبة زيت مقلبين فيها الشعرية واول متحمر الشعرية هننزل الرز ونكمل تقليب ،

• في الوقت ده هتكوني محضرة مياه مغلية تغطي الرز ب 2 سم وتنزلي المياه على الرز وتحركي بس هتضيفي حبة ملح ومرقة وحبة فلفل اسود وتقلبيه وتغطي وتهدي النار خالص على الرز.

• كدا على النار فيه حلة العدس ،وحلة الحمص ،وحلة المكرونة ،وحلة الرز ، تمام كدا 

• الاربع حلل دول عايزين متابعة ، يعني تبصي عليهم كل شزوية عشان تشوفي كمية الميياه قلت او فيه حاجة استوت مثلا ، متنسيش كمان ان المكرونة محتاجة تتقلب بشويش كل شوية ، اول متحسي انها قربت تستوي ، تنزليها من على النار وتصفيها من المياه ، بس اوعي تتلسعي 

• كمان تابعي مع الرز ولو حسيتي انه استوى ، حركيه ونزليه من على النار 

• كدا فاضل العدس واحمص ودول بياخدو حبة وقت اضافي ، نكون خلصنا باقي المكونات 

صلصة الكشري

 صلصة الكشري نوعين نوع بالتوم ونوع بالبصل هاوريكي النوعين 

صلصة التوم

• 8 فصوص توم مفرومين

• معلقتين زيت

• كوبيتين عصير طماطم 

• نص علبة صلصة جاهزة

• معلقة صغيرة كمون

• معلقة صغيرة كثبرة

• معلقة صغيرة فلفل اسود

• ملح حسب رغبتك

الطريقة

هنجيب حلة متوسطة وننزل بالزيت واول ميسخن ننزل بالتوم ونقلب باستمرار واول ميبقى لونه دهبي ننزل بالتوابل ونقلب وننزل بعدها علطول بعصير الطماطم والصلصة  ونظبط الملح واوعي تملح منك ، هتغطي الجلة وتسيبيها تتسبك على نار متوسطة.

صلصة البصل

لو مش حابة التوم وعايزة تعمليها ببصلة ، هنجيب نفس المكونات اللي فاتت ، بس نحذف التوم ونخليها بصلتين كبار متقطعين صغير ، وهنقلبهم في الزيت برضه واول مالبصلة تاخد لون هننزل عصير الطماطم والصلصة ونظبط الملح والتوابل ونسيبيها تتسبك على نار متوسطة .

مقادير التقلية المقرمشة👇

• بصلتين كبار متقطعين جوانح.

• معلقة نشا .

الطريقة 

• اول حاجة ، اجيب البصلتين واخلطهم كويس بالنشا واتاكد اني غلفتهم كويس خالص 

• الخطوة التانية ومهمة جدا لسر قرمشة التقليه ، ان اجيب حلة او طاسة عميقة واحط كمية زيت كويسة واول ما تسخن ، انزل بالبصل واسيبه شوية من غير تقليب ، وبعد كدا هاقلب بشويش ، واول مياخد اللون الدهبي ، هاهدي النار وبعد تقليبتين كمان هانزله من على النار واحطه على ماشف ورقية ، وبعدها حطيها في طبق وتكون جاهزة .

مقادير الدقة 

• كباية مياه مغليه

• معلقة توم مفروم

• معلقة كمون مع كثبرة مع ملح

• عصير لمونة

• نص كباية خل

الطريقة

• هتجيبي كوباية ميه سخنه وهتحطي فيها معلقة صغيرة ثوم مفروم ومعلقة صغيرة كمون ومعلقة صغيرة كزبرة ناشفة وعصير ليمونة ونص كوباية خل وقلبيهم مع بعض كويس وظبطي الملح حسب زوقك ودوقي وشوفي لو محتاج ملح او طعمه مركز وعايزه تخففيه.

• نسيبه على جنب لحد م مكوناته تترسب ونعمل الشطة.

 طريقة عمل الشطة

• هتجيبي شوية من الزيت اللي استخدمناه لقلي البصل وهتحطيه في حلة عميقة على النار وتحطي فيه الشطة بالكمية اللي تناسبك وهو دافي وقلبي لحد م تلاقي في فقعات ظهرت.

• هتحطي تلت كوباية من الدقة ومعاهم نص كوباية من الصلصة وقلبيهم وكده احنا جهزنا الشطة.

كدا فاضل ازاي هتقدميه في طبق خاص بالكشري👌

انتي هترصي كل الحلل جنب بعضها ، بحيث لو عندك اعداد كبيرة او اطفال كتير ، الدنيا متقعش منك ،

اول حلة هتكون حلة المكرونة ، جنبها على يمينها حلة الرز ، جنب الرز هتكون حلة الصلصة ، جنب الصلصة حلة العدس ، وبعدها حلة الحمص ،وبعدها ، التقليه المقرمشة، والدقة بانواعها خليها في كبايات وتكون اخر صف الحلل . 😄

كمان نركز اننا منغرفش بنفس المعلقة ، يعني خلي في كل حلة معلقة او مغرفة خاصة بيها ، وعلمي طفلك انه يغرف من الحلة ويسيب المعلقة فيها ميحطهاش في حلة تانية ، الطبق لو هتجهزيه بنفسك يبقى هتعمليه بنفس ترتيب الحلل .

تجيبي طبق ميكونش مسطح وتحطي المكرونة وفوقها الرز وبعده الصلصة ثم العدس والحمص والدقة واخر حاجة التقلية .