طريقة عمل الايس كريم من البيت باكتر من نكهة
الايس كريم لاغنى عنه في الصيف لانه محبوب جدا خاصة عند الاطفال ،
تقدري تتجنبي قلقك من الايس كريم الجاهز ، وتعمليه بنفسك في البيت باي
نوع فاكهة موجود عندك او بطرق تانية هنعرفها مع بعض .
ايس كريم الشيكولاتة :
هنحضره بمكونات موجودة ، وحاولت بقدر الامكان اجيبلك مكونات موجودة وسهل تحصلي عليها .
المقادير :
- 2 كيس كريم شانتيه، ولو عندك كريمة لباني ، هيكون كويس خالص
- نص كوباية حليب مكثف ، هاوريكي طريقته متقلقيش
- نص كباية كاكاو
- ربع لتر حليب
الطريقة :
اول حاجة هنعرف ازاي نعمل الحليب المكثف مع بعض :
- مقادير الحليب المكثف :
- كبايتين سكر
- كبايتين لبن بودرة
- كباية مياه مغلية
- ربع كباية زبدة
طريقته: سهلة وهي عبارة عن خطوة واحدة ، هتجيبي كل المكونات دي في الخلاط وتضربيهم كويس اوي وبعد كدا هتسيبيه في التلاجة يبرد قبل منستعمله .
مش هناخد الحليب المكثف كله طبعا ، احنا هناخد نص كباية ونشيل الباقي في برطمان مقفول كويس، هتحتاجيه بعد كدا في اكتر من وصفة .
احنا كدا جاهزين نعمل الايس كريم :
- هنجيب خلاط ونحط فيه الكريم شانتيه واللبن ونضربهم كويس وننزل بالحليب المكثف والكاكاو ونكمل ضرب .
- هنحضر قالب او أي حاجة تحبي تحفظي فيها الايس كريم بتاعك عشان يتجمد ويكون جاهز للاولاد
ايس كريم الفانيليا
نفس طريقة ايس كريم الشيكولاتة ، بس هنشيل الكاكاو ونحط مكانه نص معلقة فانيليا .؟
يبقى هنحضر الحليب المكثف واللبن والكريم شانتيه والفانيليا ونضربهم في الخلاط ، طريق سريعة وسهلة جدا ونشيلهم في الفريزر
ايس كريم المانجو
المكونات :
- حبايتين مانجو مجمدين ومنزوع منهم القشر والنواة .
- نص كباية زبادي .
- نص كباية عسل ابيض ، ولو مفيش ممكن نص كباية سكر .
- معلقتين حليب مكثف .
طريقة التحضير :
- بكل بساطة هنحط المانجا المتجمدة في الخلاط ومعاها العسل الابيض او السكر، والزبادي والحليب المكثف ونضرب جامد ونحضر قالب ونشيلهم في الفريزر .
- ممكن تستبدلي المانجا باي نوع
فاكهة عندك ، زي ، الفراولة ، او الخوخ ، او البطيخ ، او موز ،أي فاكهة صيفية عندك
يكون الاولاد بيحبوها ، بس لازم تكون مجمداها قبل متشتغلي بيها عشان تكون النتيجة
افضل .