كيفية صنع شوكولاتة في المنزل

الشوكولاتة اسمها لوحده يديكي شعور رائع بالسعادة واعتدال المزاج ، فما بالك بقى لو تناولتيها والجميل كمان لو صنعتيها بنفسك في البيت
مكوناتها تقدري توفريها بسهولة وكل حاجة موجودة عندنا في البيت

👈 الشيكولاتة الصلبة 👉

المكونات :👇

• كبايتين كاكاو

• كبايتين سكر

• فنجان لبن سايل

• فنجان لبن جاف

• فنجان بندق ولو معندكيش بندق ، ممكن أي نوع مكسرات

• معلقتين سمن او زبدة

الطريقة :👇

• 💦احنا متعودين دايما مع بعض اننا بنشتغل حبة حبة بطريقة سهلة ومفيهاش أي كلاكيع .

• 💦اول حاجة ، هنجهز الخلاط بتاعنا ونحط السكر واللبن السايل ونشغله على سرعة عالية علشان ندوب السكر .

• 💦بعد كدا هننزل باكاكاو واللبن الجاف ونكمل ضرب على نفس السرعة .

• 💦هنسيح السمن او الزبدة على النار وننزلهم بشويش في الخلاط وهو شغال.

• 💦اخر اضافة والخلاط شغال برضه ، اننا ننزل فيه نص كمية البندق ونسيب النص التاني.

• 💦اتاكدي ان الخليط اصبح متجانس تماما ومفيهوش أي مشاكل ، بعد كدا هتكوني مجهزة أي نوع قوالب صغيرة او كبيرة ، زي متحبي وتنزلي الشيكولاتة وهي سايحة وتحطي حبة بندق في القالب لكل قطعة شيكولاتة .

• 💦هتسيبي الشيكولاتة في الفريزر لغاية متتجمد.

• 💦بعد كدا هتخرجيها من الفريزر وتطلعيها من القوالب وترصيها في علبة تلاجة وتشيليها بعيد عن الفريزر ، وتستخدميها وقت متحبي .

👈 شوكولاتة النوتيلا : 👉

النوتيلا هي شوكولاتة كريمي بالبندق ، بيحبها الكبير قبل الصغير بسبب طعمها اللي بيميزها عن باقي انواع الشوكولاتة ، وممكن تدخل في اكتر من وصفة اكل ، احنا نقدر نعملها من البيت بمكونات عارفين مصدرها وبشكل صحي ومضمون .

المكونات :👇

• كباية لبن حليب

• كباية كاكاو

• كباية سكر

• نص كباية زيت

• معلقتين كبار لبن بودرة

• كيسين نسكافيه بطعم البندق

• معلقة فانيليا وممكن نستغنى عنها

الطريقة :👇

• 😋اول حاجة ، هاغلي اللبن واسيبه يبرد

• 😋بعد ما يبرد هانزله في الخلاط مع السكر واشغل الخلاط

• 😋وانزل باقي المكونات الجافة زي اللبن البودرة والنسكافيه ، والكاكاو والفانيليا واسيب الخلاط شغال ، واتاكد ان كل المكونات امتزجت كويس اوي

• 😋هانزل بالزيت على المكونات دي بالتدريج ، والخلاط شغال واضرب كل المكونات مع بعض للتاكد من ان كل المكونات امتزجت ، وبكدا ابقى حضرت نوتيلا بيتي مضمونة وصحية لاولادي وضيوفي

• 😋هاحفظ النوتيلا في برطمان مناسب واشيلها في التلاجة لوقت الاستخدام .

  👈الشيكولاتة البيضا 👉

   الشيكولاتةالبيضا نوع من الشيكولاتة وبيستخدم في تزيين الكيك وكمان بنستخدمها في التقديم .

  مقاديرها وطريقة صنعها بتختلف من مكان لمكان ، احنا هنعملها باسهل طريقة منهم واقل مكونات . 

  المقادير : 👇

  • 100جرام زبدة كاكاو ولو مش موجودة ، تقدري تستخدمي الزبدة العادية اللي موجودة عندك

  • نص كباية سكر ناعم 

  • معلقتين كبار لبن بودرة

  الطريقة : 👇

  • 😋هتجيبي الزبدة ونحطها في اي حلة صغيرة وترفعيها على نار هادية واول متسيح معاكي ، هتنزلي السكر وتحركي باستمرار ، وبعد كدا هتضيفي اللبن البودرة وتكملي تقليب وتاكدي ان مفيش اي كتل في الخليط.

  • 😋هتطفي النار وتنزلي الخليط وهو سخن في الخلاط وتضربيه جامد عشان تتاكدي انه اصبح ناعم جدا ومتجانس.

  • 😋هتجيبي القوالب اللي عندك وبتبقى قوالب صغنن اوي وغالبا هتبقى سيليكون ، وتنزلي الخليط فيها بحرص ، وتسيبيه يبرد في التلاجة 

  • 😋هتخرجيه بعد ما يبرد ويبقى صلب وتحفظيه في وعاء خاص بالشيكولاته لحين استخدامه .