الكرشة : طرق تنضيفها وتحضيرها
تعتبر الكرشة من الاكلات الشعبية المحببة جدا عند معظمنا ،لكن مش أي عروسة جديدة عندها خلفية عن طريقة تنضيف الكرشة ،😍
تابعي معايا بالخطوات ازاي هننضفها :👇
- هنجيب الكرشة ونغسلها كويس ونزيل منها أي دهون عالقة وكل ده بمياه باردة ،
- هنجيب وعاء فيه مياه ونرفعه على النار ونسخن المياه بس خدي بالك متخليهاش توصل لمرحلة الغليان ،
- اول متلاقيها كدا خلاص هتغلي ، هتطفي النار وتنزلي الكرشة فيها وتغطيها كلها وتتاكدي ان اجزاءها اتغطت في المياه السخنة
- مش هتخليها في المياه السخنة كتير بس هتكرشي حتة وتشوفي لو القشرة اتخلعت يبقى طلعيها من المياه السخنة وافرديها على أي حاجة مسطحة وبضهر السكينة اكرشيها واخلعي منها كل القشرة الغامقة لغاية مهتلاقيها كلها اتحولت للون الابيض .
- بكدا انتي خلصتي اول مرحلة ، تاني محلة هتشطفيها كويس اوي بمياه وخل وملح اكتر من مرة
- تغلي مياه تاني على النار وتغسليها بمياه مغلية المرة دي بس تغسليها بس يعني متسيبيهاش على النار ، انتي مش هتسويها.
- هتقطعيها حتت صغيرة وتسيبيها لاكتر من وصفة وتشيليها في الفريزر ، هي كدا جاهزة للسوى علطول.
طريقة عمل الكرشة
فيه اكتر من طريقة لعمل الكرشة هنختار اسهلها ونعملها مع بعض👌
الكرشة المشوحة
- نص كيلو كرشة متقطعة صغير
- بصلتين متقطعين
- فصين توم مفرومين
- حبة طماطم متقطعة
- قرنين فلفل
- ملح وفلفل وتوابل وبهارات
الطريقة :
- اول حاجة هنسلق الكرشة في اناء بملح ابيض وورقتين لورا مع ليمونة متقطعة لمدة ربع ساعة
- هنصفي الكرشة كويس من المياه
- في طاسة عميقة هنشوح البصلة والتوم والفلفل والطماطم واول ميدبلو هننزل عليهم الكرشة المسلوقة والمتقطعة ونقلب لتمام النضج . وتقدميها علطول .
الكرشة المحشية
المكونات والطريقة شبه المومبار المحشي .
المكونات :
كيلو كرشة
كوبايتين ارز مغسول ومتصفي
كوباية لحم مفروم
نص كوباية بقدونس مفروم
بصلتين مفرومين
فصين توم مفرومين
ملح وفلفل وبهارات حسب الرغبة
الطريقة :
👈 هنقطع الكرشة قطع متساوية بشكل مربع 6 سم في 6 سم ، ونسلقها في مياه وملح وورق لورا وبصل وليمون وخل لمدة 10 دقايق ونصفيه من المياه ونسيبها تنشف ، بعد كدا ،نخيطها من جميع الاتجاهات ماعدا اتجاه واحد هنسيبه مفتوح .👉
👈 في طبق عميق هنجيب الارز المغسول واللحم المفروم والبصل المفروم والثوم المفروم والبقدونس والفل والتوابل والبهارات ونقلبهم كلهم مع بعض بشكل جيد ومنحطش ملح دلوقتي .
👈هنجيب الاشكال اللي عملناها من الكرشة ونحشيها بالخليط بتاعنا ونسيب مساحة صغيرة تسمح بتمدد الارز ونقفل ونخلض كل الكمية ونقفلها كويس بالخيط .
👈على النار هنحط وعاء عميق فيه مياه وبصل متقطع وتوم وورق لورا ولما يغلي هننزل الكرشة اللي حشيناها ونسيبها ساعة على الاقل على النار لغاية متستوي كويس .وبعد متستوي حطي الملح واظبطي الطعم .
👈هنخرجها من الشوربة بتاعتنا بعد السوا .
👈ممكن ندهنها بزيت ونحطها في صينية فرن ونحمرها وممكن تحمريها على النار في الزيت .
👈بعد كدا هتشيلي كل الخيط اللي استعملناه وتقطعيها وتقدميها بشكل مميز .
👈لو عندك لبن رايب وبتحبيه هتجيبي كوباية لبن رايب وهنستعملها في وصفتنا دي .
👈بعد الكرشة متستوي هتخرجيها من الشورب وتنزلي في الشوربة اللبن الرايب بس يكون بارد وتقلبي لغاية مايغلي ، بعد كدا هترجعي الكرشة تاني للنار وتنزليه على اللبن والشوربة اثناء وجودهم على النار .هيبقى طعم الكرشة حلو اوي لانها اتشبعت بنكهة اللبن الرايب . هنكمل باقي الخطوات اللي شرحناها بانك تخرجيها وتحمريها وتشيلي الخيط وتقدميها واللبن هتقدميه في كوباية جنب الطبق بتاعنا .