💟ازاي تعملي الكنافة اللذيذة وانتي عروسة جديدة ؟💟
ازاي تعملي الكنافة بطريقة صحيحة جدا
لو انتي من عشاق الكنافة يبقى هتقدري تتعلمي الطرق دي بمنتهى السهولة
، خاصة لو بتحبي الاناقة في العزومات والاهتمام بضيوفك ومعرفتك مدى حبهم للحلويات ومعرفة
ذوق كل شخص وبيحب ايه او بيفضل أي انواع من الكنافة ،خاصة ان الكنافة من اشهر الطباق او الحلويات المشهورة في شهر رمضان او الاعياد او المناسبات عامة .
هنحاول نبسط الموضوع خالص بحيث تقدري تحضري انواع منها بمكونات بسيطة ومتوفرة في البيت عندك
👈معلومة ليكي يا عروسة على السريع : الكنافة اسم شركسي وهي (تشنافه ، تشنا يعني بلبل ، فه يعني لون ،) يبقى معناها لون البلبل .فيه روايات بتقول ان اصلها فاطمي وروايات تانية بتقول ان اصلها تركي ، اشتهرت بتحضيرها بطرق عديدة وكل بلد بتحضرها حسب الامكانيات الموجودة في البلد وذوقهم في الاكل .
اولا الكنافة العادية
المقادير
كيلو كنافة
كباية ونص سمن سايح بس الكباية متكونش كبيرة يعني معيارها تقريبا 200 ملليتر
كباية نفس المعيار بتاع السمن هتمليها جوز هند ومكسرات من الموجود عندك في البيئة { بندق ، عين جمل ، لوز} ولو مفيش من المكسرات دي خالص ، هاتي فول سوداني وكسريه صغير وانفخيه كويس من القشر .
مقادير الشربات
كباية مياه
كوبايتين سكر
معلقة عصير ليمون او ورقة فانيليا او معلقة ماء ورد
الطريقة
👀ركزي معايا وابدائي بتحضير الشربات الاول .👀👇
هترفعي المياه والسكر على النار وتحركيه لمدة 20 دقيقة وتحطي عصير الليمونة او ماء الورد او الفانيليا حسب رغبتك طبعا ، وتنزليه من على النار بشويش واوعي تتحركي ، هتسيبيه في مكان بارد عشان يبرد .
نيجي للكنافة بقى 👇
هتفككي الكنافة من التشابك في اناء عميق عندك ،
هترفعي السمن على النار يسيح وتنزلي كمية بسيطة منه وتحركي بيه الكنافة ، الفكرة اننا عايزين الكنافة تتغلف بالسمن اللي عندنا ، لو قدرتي تغلفي كل كمية الكنافة بشكل جيد وزاد سمن معاكي ، مفيش داعي تحطيه ممكن تشيليه لحاجة تانية ويبقى وفرتي سعرات حرارية وخليتي الكنافة اخف ، لكن لو مزادش يبقى مفيش مشكلة .
بعد مغلفنا كل كمية الكنافة هنجيب صينية مناسبة للكنافة وندهنا كويس وننزل نص كمية الكنافة ونطبطب عليها ونساويها كويس ونرص بشويش المكسرات اللي عندنا ، وبعدها ننزل باقي كمية الكنافة ونطبطب الصينية تاني ،
هنكون مجهزين فرن بحرارة متوسطة متكونش عالية لان الكنافة مش هتتحمل نار عالية ممكن تتحرق منك ،
هندخل الصينية الفرن ونتابع معاها منسيبهاش فترة طويلة ، يعني تبصي عليها كل دقيقتين ياقمر ، وتتاكدي ان الوش والقاع اخد لون .
ملحوظة 👈: لو لا قدر الله الوش اتحرق منك 😱متقلقيش ، تقدري تشيلي بشويش كل الجزء المحروق وترجعيها تاني تاخد وش تاني بس المرة دي تاخدي بالك😁
اول ما الصينية تكون جاهزة هنكون مجهزين الشربات جنب الفرن عشان اول متطلع من الفرن ، هتجيبي مغرفة وبشويش خالص وهي سخنة والشربات يكون ساقع هتشربيها بس حتة حتة ومتنسيش المنطقة اللي شربتيها واتاكدي انها اتشربت كلها من الشربات وبعد كدا هتسيبيها في مكان تبرد لموعد التقديم .
ملحوظة 👈: اول متخلصي أي اكلة ، اغسلي كل مواعينك اول باول عشان متزدحمش عليكي ويبقى مجهود كبير وتتعبي انتي .
ثانيا : الكنافة بالقشطة
هنا هتحسي ان الموضوع بقي اصعب من الكنافة العادية ،💪 لكن لو اتبعتي معايا خطوة خطوة هتستمتعي بكل خطوة بتعمليها .👌
المقادير
(انت هيكون عندك 3 انواع من المقادير عشان متتوهيش وتتوتري)
1. مقادير الكنافة
كيلو كنافة
كوباية ونص سمن سايح
مكسرات عادية من الموجود عندك
2. مقادير الشربات
وانتي عرفتيها من الطريقة السابقة بس هافكرك بيها :
كباية مياه
كبايتين سكر
عصير ليمونة او معلقة فانيليا وممكن الاتنين
3. مقادير القشطة
هنبسط المقادير بقدرالامكان عشان يبقى سهل عليكي :
كبايتين لبن حليب
3 معالق نشا
علبة قشطة
الطريقة 👇
زي ماتعلمتي اول حاجة هتعمليها هي : انك تجهزي الشربات بانك ترفعي المياه والسكر والفانيليا والليمون على النار لمدة ربع ساعة مثلا مع التحريك المستمر، وننزله من على النار ونسيبه يبرد .
الخطوة التانية : هاجيب اللبن والنشا واحركهم بشويش بمضرب سلك يدوي عادي جدا ، وبعد ميظوب النشا ، هارفع الخليط على النار وانزل عليه علبة القشطة واحرك باستمرار كام دقيقة لغاية ماحس ان الخليط اصبح سميك معايا ، هانزله واسيبه يبرد
الخطوة التالتة : هاجيب الكنافة واقطعها صغير وانزل عليها السمن السايح واغلفها كويس .
الخطوة الرابعة : هتجيبي صينية مناسبة للكمية بتاعتك ، وتدهنيها ، وتنزلي نص كمية الكنافة ونطبطب وننزل عليها كمية القشطة اللي جهزناها مع بعض ، وننزل باقي كمية الكنافة الباقية بس خدي بالك ! اوعي تضغطي عليها جامد عشان متبوظيش شكل الصينية او القشطة تخرج من الصينية .
هنكون محضرين الفرن على درجة حرارة متوسطة وندخل الصينية ونتابع لحد متاخد لون دهبي جميل ، اول متستوي هنخرجها ونرش عليها الشربات اللي مجهزينه ونسيبها تبرد وتبقى جاهزة للتقديم .