طريقة بلح الشام لاجمل عروسة ومدام
هنشرح طريقة عمل بلح الشام بشكل سهل وسريع وتقدر أي عروسة او بنوتة تعمله ، بس قبل منشرحه هنعرف معلومة على السريع بخصوص بلح الشام .
بلح الشام عبارة عن اكلة سورية او بلاد الشام ، اللي صنعوا الحلوى دي عملوها شبه البلح في تشكيلتها بقى اسمها بلح الشام .
حلوى بلح الشام زي أي اكلة ممكن اعمله باكتر من شكل واقدر كمان اغير في المكونات حسب مانا عايزة ، او اضيف واحذف مكونات حسب راحتي .
احنا هنعمله مع بعض بشكل سهل بحيث تقدري تعمليه لو كانت دي اول مرة تعملي فيها بلح شام .
يللا مع بعض يأموره نشوف المقادير والطريقة مع بعض :👇
المقادير
كباية دقيق
كباية مياه
ربع كباية زيت
3 بيضات
رشة ملح صغيرة
ربع فانيليا
معلقتين نشا
مقادير الشربات
- كباية مياه
- كبايتين سكر
- عصير ليمونة
- رشة فانيليا
الطريقة
اول حاجة هنعمل الشربات وطريقته سهلة جدا ، هتجيبي حلة على النار وتنزلي المياه والسكر والفانيليا والليمون وتحركيهم على النار لمدة تقريبا 10 دقايق او ربع ساعة ، وبعد كدا تنزليهم من على النار وتسيبيهم في مكان بارد ؟
بعد كدا ركزي معايا ، هتجيبي حلة وتحطي فيها الدقيق والنشا والمياه والزيت والملح والفانيليا وتحركيهم كويس وترفعيهم على النار مع استمرار التحريك ، هتلاقي الخليط اتماسك فهتطفي النار وتنزليهم وتسيبي الخليط 5 دقايق يبرد قبل متنزلي البيض لانك لو نزلتي البيض وهو سخن ، البيض ممكن يتشوي منك والاكلة تبوظ .
اول متحسي انه برد ، هتنزلي بيضة وتحركي او تعجني بمضرب او بايدك زي متحبي ، اول ما البيضة تختفي ، هتنزلي التانية وتعملي نفس الحركة ، وبعدها التالتة ، هتلاقي نفسك حصلتي على عجينة طرية ينفع تتشكل بقمع الحلويات .
لو حسيتي ان العجينة لسة تخينة معاكي ، ممكن تحطي بيضة كمان وتعجني وهتلاقيها ظبطت .
الخطوة اللي جاية مهمة حاولي تركزي معايا ، هتجيبي طاسة عميقة وتملي نصها زيت وترفعيها على النار وتكون نار متوسطة واوعي تتلسعي او ايدك تتحرق وانتي شغالة ، واثناء الطاسة على النار هتكوني حطيتي العجينة في قمع الحلويات وتحطي الشكل بتاع بلح الشام واكيد انتي عارفاه ، هتجيبي مقص نضيف ويكون في ايدك اليمين والقمع في ايدك الشمال ، هتيجي ناحية الطاسة وتقربي بشويش وتنزلي طرف المقص في الزيت، وتضغطي بالقمع عشان ينزل بشويش صباع وتقصي بالمقص الطول اللي انتي عايزاه وكل مرة تنزلي المقص في الزيت عشان ميتعبكيش في التقطيع .
هتكوني مهدية النار لانه مش بياخد وقت ويتحمر ، وعشان انتي تلحقي تقطعي كل الكمية .
اثناء القلي هتكوني جايبة الشربات ومصفاية ومغرفة مخرومة كمان ، لانك اول متطلعي من الطاسة هتنزليه في الشربات وتخرجيه وتصفيه .لغاية متخلصي كل الكمية وتسيبيه يبرد ويكون جاهز للتقديم .