الكيكة البلدي باسهل طريقة واقل مقادير

الكيكة البلدي باسهل طريقة واقل مقادير

الكيكة دي كتير مننا بيحبها لسهولة تحضيرها وممكن كمان استغنى عن المضرب الكهربائي واشتغل بمضرب سلك عادي جدا .

المكونات

• 10 بيضات بلدي او 6 بيضات ابيض او احمر
  

• ربع معلقة فانيليا

• كوبايتين سكر خشن مش ناعم

• كوباية سمن بلدي

• كوباية لبن او مياه حسب راحتك

• 3 كوبايات دقيق فاخر

• ورقك بيكنج بودر او كيك شيف

• عصير ليمونة او معلقة خل

• ربع معلقة ملح ابيض ناعم

• لو حابة الكيكة بني هتشيلي نص كوباية دقيق وتحطي مكانها كاكاو

الطريقة

قبل كل حاجة نشغل الفرن على درجة حرارة متوسطة ومتسخنيهاش اوي👌

{ كل المقادير اللي كتبناها تكون جاهزة قدامك على الطرابيزة وانتي بتشتغلي عشان متروحيش وتيجي كتير }.

👌 تجهزي وعاء عميق لخلط كل المكونات ومفيش حاجة تطلع برة 👌

 👌 تجهزي صينية الكيكة ،تدهنيها بالسمن كويس وترشي عليها دقيق وتنفضيها وتتأكدي ان كل اجزاءها اتغطت بالدهان كويس وتسيبها على جنب دلوقتي . 👌

👌 اول حاجة هنكسر كل البيض اللي مجهزينه في الوعاء بتاعنا ،ونحط الفانيليا ،والملح ،والسكر الخشن والخل او عصير الليمونة ،ونضرب بمضرب سلك عادي جدا 👌

 👌 هنفضل نضرب لغاية منتاكد ان السكر اختفى خالص والخليط بقى هش معايا .👌

 👌 هننزل بالسمن البلدي على الخليط ونكمل ضرب وبعدها اللبن او المياه .👌

 👌 هنجيب الدقيق وننخله تاني مع البيكنج بودر والكاكاو وننزله على الخليط حبة حبة ونخلط بشويش عشان منخرجش الهوا 👌

 👌 هنتاكد ان كل الخليط بقي تمام وكل الحوافي نضيفة مفيش أي دقيق فاضل فيها ، هنروح منزلينه في الصينية اللي جهزناها  ،ونخبط الصينية ونلفها عشان نتاكد ان كل الخليط متساوي في الصينية ،👌

👌 هنشوف الفرن ونتاكد انها مش سخنة اوي وندخل الصينية بشويش ونقفل عليها 👌.

 👌 مش هنفتح قبل ربع ساعة على الاقل عشان الكيكة متهبطش مننا .👌

👌 وبعد كدا هنختبرها بخلة اسنان لو طلعت نضية يبقى الكيكة استوت . 👌

 👌 هنطفي الفرن ومنخرجش الكيكة علطول ، هنستنى شوية ترتاح يعني 3 دقايق كدا ، بعد كدا هنخرجها ونقلبها علي منخل او أي صينية عندك نرجعها تاني وتغطيها لغاية متيجي تستخديها سواء في الفطار او عزومة شاي مع صاحباتك او للاولاد وهما رايحين المدرسة .👌

👇نصايح حاولي متنسيهاش لما تعملي الكيكة 👇

👈البيض لازم يكون طازة معداش عليه ايام ده هيديكي نتيجة حلوة خالص👉

الدقيق لازم يكون دقيق مخصص للنواعم والحلويات ،واي حلواني هيعرف الكلام ده ، يعني متشتريش دقيق وخلاص 👉

👈الفانيليا حاولي تجيبي الفانيليا السايلة او الفانيليا الخام بلاش الورقة الحمرا اللي فيها سكر 👉

👈ممكن بدل متحطي عصير ليمون ، تبشري الليمونة نفسها ده بيديكي نكهة تجنن ، وممكن بدل الليمون برتقال وتبقى كيك بنكهة البرتقال وكدا مش هتحطي فانيليا .👉

👈الملح اساسي في أي نواعم او حلويات بتعمليها ، هو اللي بيبين طعم السكر ويدي نكهة جميلة بس اوعي تزودي الكمية ، 👌يدوب على سن معلقة الشاي .👉

👈السكر يكون خشن افضل من الناعم لانه على مايدوب مع البيض هيخرج هوا ويعمل رغوة جميلة 👉

👈لو مش حابة السمن في الكيك ممكن تبدلي بزيت او زبدة 👉

👈ممكن بدل اللبن مياه او زبادي بس هنقلل الكمية طبعا لو كان زبادي 👉

👈تعرفي ازاي ان ده السمك المناسب للعجينة ؟ تكتبي اسمك وانتي ماسكة مضرب السلك اليدوي بالعجين نفسه لو اسمك اختفى قبل متكمليه يبقى العجينة طرية حبة ، لو اسمك اختفى بعد ثواني من كتابته يبقى كدا العجينة تمام 👉

👈بالنسبة للفرن ، لازم تشغليها قبل متبدأي وتكون حرارتها متوسطة 👉

👈الصينية لو مش هتدهنيها ، يبقى تجيبي ورق زبده وتحطيها في القاع والحيفان بتاعة الصينية 👉

👈اوعي تخرجي الكيك من الفرن علطول اول متطفي الفرن ، استني عليها 3 دقايق عشان متهبطش منك 👉