عمل اسهل بسبوسة بأيدين اجمل عروسة

عروستنا الجميلة وصفتنا النهاردة هي تحضير البسبوسة وهنقول طريقتين سهلين ومشهورين والكل هيحبهم خاصة من ايدك ، بس قبلها هنقول نبذة صغيرة عن تاريخ البسبوسة

البسبوسة من الحلويات اللي معظمنا بيحبها وبيحرص على تناولها بعد الوجبات ، او العزومات ، او الاعياد ، او حتى لو هنروح زيارة بتكون البسبوسة هدية لطيفة ندخل بيها على اصحابنا او اقاربنا ، بالرغم ان البسبوسة اصلها مش مصري ، بل اصلها عثماني ، زمان العثمانيين كانو مشهرين جدا في صناعة الحلويات ونشر الثقافة دي على البلاد اللي بيدخلوها . ولما دخلت البسبوسة مصر ، اضافو ليها المصريين بصمتهم ولامستهم الخاصة من مكسرات وقشطة وغيرها من اللمسات الساحرة للبسبوسة ،وبسبوسة او هريسة السميد ترجع تسميتها لبس السميد مع السمن فبقت بسبوسة .

دلوقتي نشوف مقادير البسبوسة السادة مع بعض وازاي هنحضرها بشكل بسيط ولطيف .

👈(متنسيش انك تستمتعي بكل خطوة تعمليها وانتي في مطبخك لان الوقت اللي بيروح مش بيرجع .)

المكونات

• كيس بسبوسة  (سميد ، سيمولينا ) من أي حلواني وأي نوع تحبيه

• كباية لبن حليب او رايب زي متحبي

• نص كباية سكر

• نص كباية سمن او زبدة او زيت ، برضه زي متحبي

• معلقة فانيليا

• معلقة بيكنج بودر

• ربع كباية جوز هند

مكونات الشربات

• كبايتين سكر

• كبايتين مياه

• معلقة فانيليا

• عصير ليمونة  

الطريقة

اول خطوة هنحضر الشربات بتاعنا :

• هنرفع السكر والمياه والليمونة والفانيليا على النار ونقلب عشر دقايق وننزله ونسيبه ونيجي للخطوة اللي بعدها ,

• في بولة عميقة هنجيب السميد والزبدة واللبن والسكر وجوز الهند والبيكنج بودر والفانيليا وتخلطيهم بمعلقة او مضرب يدوي بطريقة بسيطة جدا لغاية متلاقي الخليط بقى متجانس معاكي .

• هتجيبي صينية مقاس مناسب بس متكونش عميقة ، انتي اكيد هتعرفي شكل صواني البسبوسة !

• هتدهنيها بزيت او أي مادة دهنية وبعدها تفردي الخليط بتاعنا وتظبطية في الصينية كويس وممكن تحطي فوقها حبات فول سوداني

• هنكون محضرين فرن بدرجة حرارة متوسطة ، وهندخل الصينية الفرن ونقفل بس نتابع معاها ونشوفها كل شوية لغاية متاخد اللون الدهبي اللي بتحبيه .

• ملحوظة : 👈شربات البسبوسة مختلف عن باقي الحلويات ، بيبقى سخن مش بارد لما نيجي نشرب البسبوسة .👉

• اول منخرجها من الفرن هنسقيها من الشربات السخن اللي جهزناه ، وتسيبيها تبرد وتكون جاهزة للتقديم .

بسبوسة بالقشطة والمكسرات

المكونات

هي نفس مكونات البسبوسة السادة اللي عملناها من شوية 👆:

• كيس بسبوسة

• كباية لبن

• نص كباية سكر

• نص كباية سمن

• معلقة فانيليا

• معلقة بيكنج بودر

بالاضافة الى الحشو بتاعنا وهو عبارة عن :

• علبة قشطة

• كباية لبن حليب

• 3 معالق نشا

• معلقة فانيليا

مقادير الشربات

• برضه نفس المقادير :

• كبايتين سكر

• كبايتين مياه

• عصير ليمونة

• معلقة فانيليا

الطريقة

• اول خطوة هنجهز الشربات و على النار لمدة 10 دقايق زي ماتعلمنا ونسيبه

• تاني خطوة :

• هنجهز القشطة ، هنخلط اللبن مع النشا بمعلقة او مضرب سلك قبل منرفعه على النار ، وبعد منتاكد انهم اتجانسو تماما هنرفعهم على النار ونحرك واول مالخليط يتماسك هننزل بالقشطة ونحرك باستمرار ، هنحصل على خليط متماسك ومتجانس وبكداي بقة حضرنا الحشو بتاعنا من القشطة .

• هنخلط كل مكونات البسبوسة في بولة عميقة واللي هو البسبوسة واللبن والسكر والفانيليا والسمن والبيكنج بودر ، ونخلطهم كويس مع بعضهم .

• هنجيب صينية البسبوسة وندهنها كالمعتاد ، ونجيب نص كمية البسبوسة ونفردها في الصينية ، وبعد كدا نجيب خليط القشطة ونفرده بشويش على البسبوسة اللي في الصينية ، اخر حاجة ، هنجيب باقي البسبوسة ونفردها على القشطة بس نحاول منحركش القشطة من مكانها ، يعني نفردها بشويش خالص ، عشان نحافظ على شكل الصينية .

• هنكون مجهزين الفرن على درجة حرارة متوسطة ، وندخل الصينية الفرن ونتابع .

• هنخرجها من الفرن اول منتاكد انها اخدت لون دهبي جميل ، وتسقيها شربات سخن زي ماتفقنا ، وتسيبيها تبرد .

• ياريت متقطعيهاش وهي سخنة ، كل مكانت باردة كل مكانت اجمل في التقطيع .