طاجن اللحمة الضاني بالبطاطس
الطريقة دي مناسبة للعروسة اللي لسة متعودتش على الطبخ فنبدأ بطريقة سهلة ومكونات بسيطة وهيطلع معنا نتيجة حلوة جدا ، كمان الطريقة دي تنفع لاي نوع من اللحمة مش بس اللحمة الضاني .
المكونات
المكونات
- كيلو لحمة ضاني
- 4 بصلات متوسطين مبشورين
- كيلو طماطم مفرومة + علبة صلصة
- 8 فصوص توم مهروسين
- 4 قرون فلفل اخضر او احمر متقطعين
- بهارات لحمة
- التوابل اللي بتحبيها ، ممكن معلقة كسبرة +معلقة كمون + معلقة فلفل اسود .......
- 2 ليمونة + معلقتين خل
- ملح حسب الطلب
- كيلو بطاطس متقطع دواير
ملحوظة ممكن تستبدلي البطاطس باي خضار انتي بتحبيه
الطريقة
هاوريكي طريقة جميلة عشان اللحمة بتاعتك تستوي كويس ومتاخدش وقت كبير في الفرن👇
👈 اول حاجة هتغسلي اللحمة الضاني كويس وتسبيها حبة لغاية متجهزي باقي المكونات .
👈هتجيبي البصل المتقطع وتشويه على النار بحبة زيت او بحبة دهن من الضاني اللي عندك وده هيبقى صحي اكتر .
👈اول مالبصل يدبل معنا هننزل عليه التوم والفلف اللي مجهزينه ونقلب كله على النار .
👈هيتشوحو كويس وتلاحظي.🙇 كدا الخطوة اللي جاية هتنزلي الطماطم المفرومة وعلبة الصلصة اللي عندنا والتوابل والبهارات اللي مجهزاهم وحبة ملح وعصير الليمون والخل وتدوقي وتشوفي الملح مظبوط ولا لسة واوعي الاكلة تملح منك .👉
👈هنسيب الخليط ده يغلي على النار كويس وبعدها هنجيب اللحمة المغسولة ومتقطعة وننزلها على الخليط وهو على النار ونقلب ونسيبهم يغلو لمدة 10 دقايق .
👈هنطفي عليها النار ونجهز صينية فرن ونجهز البطاطس المغسولة ومتقطعة ونرص في الصينية البطاطس باللحمة بعد مخلطناها مع بعض وندخلها فرن نكون مشغلينها قبلها عشان تكون سخنة ونقفل عليها الفرن ونستنى ربع ساعة ونختبر السوى من خلال حبة بطاطس ادخل فيها الشوكة لو دخلت بسهولة يبقى البطاطس تمام ، وكمان اعمل مع قطعة لحمة نفس الكلام لو استوت يبقى اخرج الصينية بتاعتي واغطي وشها واشيلها لغاية ماييجي وقت التقديم .
👈لو الصينية بايركس حراري يبقى اقدمها على السفرة بعد ماخرجها من الفرن ومفيش داعي لسيرفيس ، بس اجملها بحبة بقدونش او كسبرة خضرا على الوش .
👈لو الصينية الومنيوم : يبقى هانقل الخليط بمعلقة توزيع كبيرة وارصها بشويش في سيرفيس مناسب واجملها واقدمها . وبالهنا والشفا .
لحمة ضاني مشوي بدون فحم
الطريقة دي مناسبة لللي ساكنين في شقق مقفولة ومينفعش فيها الفحم عشان الدخان او اللي معندهمش شواية فحم .
المكونات
- كيلو لحم ضاني او أي نوع
- بصلتين
- 2 طماطم
- علبة زبادي ابيض
- قرنين فلفل اخضر
- قرن فلفل احمر
- 5 فصوص ثوم
- معلقتين خل
- 2 ليمونة
- توابل مشكلة (فلفل اسود + كسبرة + كمون + جوزة الطيب + كركم + بابريكا + 4 مرقة فراخ ) معلقة من كل نوع توابل .
- بهارات لحمة
الطريقة
👌هنجيب خلاط عادي في كوباية العصير او نجيب كبة وهنحط فيها
{البصل ، الطماطم ، الزبادي ، التوم ، والخل ، الليمونتين ، والفلفل الاخضر والاحمر ، والتوابل والبهارات } ونشغل الخلاط ونفرم كل الخليط ده بس بدون ملح .
👌هنكون مجهزين اللحمة وغاسلينها ومقطعينها بحيث تكون قطع رفيعة وطويلة ، هنتبلها كويس اوي بالخليط بتاعنا ونسيبها اد منقدر في التلاجة اقصاها يوم كامل وممكن اقل حسب وقتك واحتياجك ليها .
👌يعني لو عندك عزومة اعملي الخلطة دي من امبارح وسيبيها في التلاجة .
👌هنيجي نسويها بقى ، نفتكر اننا محطيناش ملح لسة ، هنحط الملح ونقلب الخليط كويس ونظبط الملح .
👌هنجهز طاسة جريل مضلعة عادية خالص ونحطها على النار لغاية متسخن ونرص عليها اللحمة ونسيبها تاخد لون ونقلبها على الجنبين لغاية متأخذ لون محمر . بعدها هنرصها في صينية فرن وندخلها الفرن سخنة ونسيبها ربع ساعة تقريبا لإتمام النضج .بعد منخرجها من الفرن هنقدمها في طبق تقديم مع السلطات والبقونس .