عمل البصارة بطريقة جبارة
البصارة من الاكلات المصرية القديمة واللي اغلب الناس البسيطة بتحبها عشان تكاليفها بسيطة جدا وطريقتها كمان بسيطة ، لو تركزي معايا ، هنعمل مع بعض احلى طبق بصارة تفرحي بيه اسرتك خاصة انها لو اتعملت صح بتبقى لذيذة اوي .
المقادير
نص كيلو فول مدشوش ومقشر ( فول اللي بيتعمل منه المدمس )
بصلة متقطعة
5 فصوص ثوم
طماطماية واحدة
قرنين فلفل اخضر او احمر
كسبرة خضرا
بقدونس اخضر
شبت اخضر
حبة ملح صغيرين
معلقة كمون مطحون
معلقة فلفل اسود
3 معالق ملوخية ناشفة ومطحونة
راس كاملة توم متقشر ومطحون كويس لعمل التقلية
بصلتين متقطعين شرايح رفيعة لعمل الزينة
الطريقة
يلا نبدا مع بعض في عمل البصارة ، اول حاجة هترفعي حلة على النار ويكون مقاسها مناسب لكمية البصارة اللي هنعملها واعملي حسابك ان الخليط هيزيد بعد السوى
هنحط الفول والمياه والطماطماية و5 فصوص ثوم والبصلة ، ونسيبهم يغلوا لمدة ساعة
هتعرفي الفول اذا كان استوى ولا لا ،بانك تدوسي على حبة فول بشوكة وتشوفيها طرية ولا لسة ناشفة ، لو كانت طرية يبقى تمام .
هتنزلي الفلفل والبقدونس والكسبرة والشبت ، وكمان الملح والكمون والفلفل الاسود ، وتسيبيهم يغلو مع الفول ربع ساعة ، وبعدها هنطفي النار ونسيبهم يبردوا.
هنكون مجهزين الخلاط بتاعنا العادي ونجيب كل الخليط بتاعنا بعد ما يبرد وننزله في الخلاط ونضربه كويس لغاية منلاقيه ناعم ومفيهوش أي قلاقيع ، وممكن تزودي مياه لو لقيتي القوام سميك معاكي .
هتجيبي طاسة صغننة ومعلقة زيت وتنزلي بالتوم المفروم وتقلبي لغاية ميبقى اللون دهبي جميل وتبعديه عن النار كدا التقلية جاهزة
هنرجع الخليط للحلة تاني ونرفعه على النار وبعد 5 دقايق هننزل بالتقلية اللي عملناها .
يدوب البصارة تاخد غلوة واحدة بعد تقلية التوم ، هنا بقى فيه اختيارين
الاول : انك تسيبيها كدا من غير ملوخية ، ده لو حد عندك مبيحبش الملوخية
التاني انك تقسمي الخليط جزء تسيبيه من غير ملوخية ، والجزء التاني ، هتجيبي 3 معالق ملوخية وتنزلي على البصارة وتسيبيها تغلى 5 دقايق بس ، لو الخليط سميك ممكن تزودي مياه وتسيبيه يغلي 5 دقايق كمان وبعدها تطفي النار ، وكدا البصارة جاهزة للتقديم
فاضل بس انك تشوحي البصلة المتقطعة شرايح وتحمصيها جامد وترشيها على وش الطبق قبل التقديم مباشرة ودي خطوة اختيارية ، يعني ممكن تستغني عنها ومتعمليهاش يعني حسب راحتك
ملحوظة :
حاولي تظبطي الملح وميزيدش منك ، لان الملح لو قليل سهل تعالجيه ، لكن لو زاد هتبقى مشكلة كمان نقطة عايزاكي تاخدي بالك منها وهي : انك هتحسي ان الطريقة طويلة اوي ومملة ، بس ده عشان اول مرة تعمليها ، لكن بعد كدا انت تقريبا مش هتبصي على الصفحة دي لانك هتكوني حفظتي الطريقة من اول مرة .