طريقة عمل العيش السوري باللحمة والفراخ

العيش السوري

من اكتر انواع الخبز شهرة في العالم العربي وممكن خبزه بالدقيق الابيض او الاسمر وترجع شهرته لأنه خفيف على المعده ومش بيسبب زياده فالوزن ويمكن استخدامه في تحضير الوجبات المالحه أو الحلوة .

مكونات العيش السوري:

• نص كيلو دقيق منخول كويس جدا سواء دقيق ابيض او اسمر.

• معلقه الا ربع خميره.

• كوبايه الا ربع ميه فاتره.

• ملح حسب الرغبه.

طريقه تحضيره :

• نخلط الملح والدقيق والخميرة مع بعض وتنزل عليهم بالميه الفاترة ونعجن كويس اوي ونتأكد أن مفيش كلكعه.

• نسيب العجينه ترتاح نص ساعه وتخمر في مكان دافئ بس اهم حاجه تكون متغطيه.

• هناخد العجينه نفرغ الهوا اللي جواها ونقسم العجينه لكرات صغيره ونرش حبه دقيق في المكان اللي هنفرد العجينه فيه وتفرد بعصايه فرد لحد م تبقا رقيقه جدا وعلى صاج عيش أو طاسه سخنه حطيه لحد م يحمر وقلبيه عالناحيه التانيه وبكده يكون العيش السوري جاهز وابدعي في الحشوات اللي تحبيها.

للحشو بقا هنعرف مع بعض طريقة عمل شاورما الفراخ السوري وشاورما اللحمة .

 

شاورما الفراخ السوري

المكونات :

• نص كيلو فراخ متقطعه قطع صغيرة.

• 2 فلفل رومي متقطع شرائح طوليه.

• ثمرة طماطم كبيرة متقطعة قطع صغيرة.

• معلقتين بهارات شاورما من عند العطار.

• 3 ملاعق خل ابيض.

• ملح وفلفل.

• زيت نباتي.

• نص كوبايه ميه.

• بصل بودر.

طريقة التحضير :

• في طبق عميق هتحطي بهارات الشاورما والخل والملح والفلفل والبصل البودر والفراخ ونص كوب ماء واخلطيهم ف بعض كويس اوي وغطيهم بورق شفاف وحطيها فالتلاجه اقل حاجه ساعة.

• هتجيبي طاسة حطيها على النار وفيها معلقتين زيت نباتي كبار وانزلي بالفراخ وقلبي لحد م تستوي وحطي باقي الخضار وقلبيه تقلبتين وكده جهزنا حشوة الشاورما السوري.

 

شاورما اللحمة السوري.

المكونات :

• نص كيلو لحم بقري.

• ربع كوباية خل.

• ربع كوباية عصير ليمون.

• نص معلقة صغيرة فلفل اسود.

• نص معلقة صغيرة ثوم بودر.

• نص معلقة صغيرة كزبرة ناشفة.

• نص معلقة بابريكا.

• نص معلقة بهارات.

• ملح.

• ربع كوباية زيت زيتون.

• بصلة متقطعه جوانح صغيرة.

• ثمرتين طماطم متقطعة جوانح رفيعة.

• ثمرتين فلفل رومي متقطع شرائح طوليه رفيعة.

طريقة التحضير :

• في طبق عميق هتحطي المكونات اللي عندنا زي الخل وعصير الليمون والبهارات والملح والفلفل الأسود والبابريكا والكزبرة والثوم والبصل البودر واللحمة تكون متقطعة صغير .

• حطيها فالتلاجة قبلها بليلة أو ساعتين على الاقل.

• في طاسه على النار هتحطي زيت الزيتون وتحطي اللحمة لحد م لونها يتغير بعدها ضيفي البصل والفلفل لحد م يدبلو وفالاخر خالص هنحط الطماطم وارفعيها من على النار وكده جهزنا حشوة شاورما اللحم السوري.

بالهنا والشفا,,,,,,,,,,,,,,,