الغريبة الناعمة

نبذة صغيرة عن الغريبة :👇

الغريبة من الاكلات المغربية واسمها في العراق شكر لمة وهي من الحلويات اللي ليها شعبية كبيرة جدا عند معظم الشعوب العربية خاصة في الاعياد ، وليها اكتر من وصفة ، زي غريبة الفرينة (الطحين )، وغريبة الحمص، وغريبة الذرة البيضا .

احنا هنعمل مع بعض الغريبة الجميلة بتاعتنا وهي غريبة الطحين .

تتميز الغريبة بان مكوناتها بسيطة وقليلة خالص وخالية من أي تفاصيل  .

هتعرفي تعمليها في اقل من ربع ساعة

كمان تقدري تتحكمي في تزيينها او حشوها باي نوع من المكسرات المتوفرة عندك

المقادير :

• كباية دقيق

• نص كباية سمن بحرارة الغرفة ( ميكونش مجمد ، ولا يكون سايل اوي )

• ربع كباية سكر بودرة

• ورقة فانيليا

• رشة ملح صغيرة خالص

• بياض بيضة

• مكسرات أي نوع تحبية ( جوز ، لوز ، بندق ، فول وداني ، ......)

الطريقة

• هنبدأ بالسمن وياريت هنا يكون فيه مضرب بيض كهربائي عشان متتعبيش ايدك بالمضرب العادي ، لكن لو مفيش ، يبقى نستعمل المضرب السلك العادي ، لكن هنضرب لمدة لغاية مالون السمن يتحول للابيض كانه كريم شانتيه او يبقى شكله كريمي وهش خاالص

• هننزل بالسكر وبياض البيضة والفانيليا والملح على السمن ونكمل ضرب ويفضل لون الخليط ابيض برضه وهش

• كدا مش فاضل غير الدقيق ، هننزل بالدقيق حبة حبة ونخلط بمعلقة او مضرب المهم هنخلص عجن ونلاقي نفسنا حصلنا على عجينة بيضا وخفيفة وجاهزة للتشكيل والخبيز علطول

• هتجيبي الصينية اللي عندك وتعملي كور صغيرة وترصيها في الصينية ، بس تكون عاملة حفرة صغيرة في كل كرة عشان تحطي فيها نوع المكسرات اللي بتحبيه

• بعد كدا هندخلها الفرن على نار هادية جدا عشان نحافظ على لون الوش الابيض الجميل

• اخر خطوة ولازم تاخدي بالك منها 👈 انك لما تخرجيها من الفرن تسيبيها في الصينية متحركيهاش الا بعد ما تبرد خالص

• بعد كدا تقدري ترصيها في أي طبق تقديم عندك وتقدميها .👌 بالهنا