طريقة عمل المقلوبة باللحمة والفراخ في خطوات بسيطة

مقلوبة اللحمة بالباذنجان

المكونات

• نص كيلو لحمة مفرومة أو مقطعة صغير.

• ثمرتين طماطم متقطعة شرائح.

• ثمرتين باذنجان رومي متقطعة شرائح.

• كوبيتين مرق لحم.

• كوباية رز منقوع.

• ملعقة صغيرة من السبع بهارات.

• ملح وفلفل اسود.

• لوز محمص ( حسب الرغبة )

• زيت نباتي.

طريقة تحضير مقلوبة اللحم

• هتعصجي اللحمة بتاعتنا وتبليها بالملح والفلفل.

• هتحمري الباذنجان لحد م يبقا لونه ذهبي.

• هتحطي الباذنجان والطماطم واللحمه على شكل طبقات اول طبقة تبقا الباذنجان والطبقة الأخيرة الرز.

• هتحطي مرقة اللحم والبهارات وسيبي الخليط الجميل ده تلت ساعة على نار متوسطة وخلي بالك هنا حطي طبق على الوش عشان يفضل الخليط ده متماسك والطبقات متماسكه ومتساوية.

• بعد م يستوي الخليط هتشيلي الطبق وتحطي طبق التقديم على وش الحلة مع مراعاة أن يكون طبق التقديم اكبر من حجم الحلة وتقلبي الخليط وزينيه باللوز المحمص ومعاه سلطة الزبادي.

مقلوبة الفراخ بالجزر

المكونات

• كيلو ونص فراخ متقطعه.

• اربع كوبايات رز بسمتي.

• 8 حبات جزر.

• حبتين بصل كبير متقطع جوانح.

• حبة بصل مفروم.

• اربع فصوص ثوم مفروم.

• قرنين فلفل اخضر مفروم.

• فلفل اسود ومستكة خشنين.

• ملح وفلفل اسود.

• ملعقة كبيرة كمون.

• 3 ملاعق عصير ليمون.

• نص كوبايه بقدونس مفروم.

• كوبيتين زيت نباتي.

• لوز.

• زبيب.

طريقة تحضير مقلوبة الفراخ بالجزر

• اغسلي الرز وانقعيه نص ساعة.

• هتجيبي طاسة وتحطي فيها كمية من الزيت وتحمري اللوز لحد م لونه يبقى ذهبي وصفيه وحطيه على مناديل يتصفى.

• حمري الزبيب وحطيه يتصفى.

• حمري قطع الجزر وحطيها على جنب تتصفى.

• حمري البصل وسيبيها على جنب يتصفى.

• وفنفس الزيت حطي قطع الفراخ تتحمر لحد م تاخد لون ذهبي وحطي معاها الثوم المفروم والبصل والفلفل لحد م ريحة الثوم تطلع.

• هتحطي الفلفل الاسود والمستكة والملح والكمون وهتحطي ميه وسيبيها على نار متوسطه لحد م تستوي الفراخ.

• هتصفي الفراخ من الشوربة كويس وهترتبي الجزر على شكل حلقات وهتحطي الفراخ وهتحطي البصل المقلي.

• هتحطي الرز على الفراخ لحد م تغطيها تماما وتحطي اربع كوبايات ونص من المرقة بس هتحطيهم بهدوء عشان تحافظي على شكل الطبقات.

• هتحطي المقلوبة على نار عالية لمدة عشر دقايق تغلي بعدها هتغطي الحلة وتهدي النار على الآخر وتسيبيها لحد م تستوي المقلوبة.

• اقلبي المقلوبة في طبق تقديم مناسب وزينيها باللوز والزبيب.

• قدميها سخنة مع سلطة الزبادي أو اي نوع تحبيه .

مقلوبة بالفراخ بالبطاطس

المكونات

• كيلو فراخ متقطع صغير.

• كوبيتين رز مصري.

• بصلة كبيرة متقطعة أرباع.

• ملعقة كبيرة ملح.

• ست قطع فلفل اسود صحيح.

• حباية طماطم كبيرة متقطعة أرباع.

• بصلة متقطعة دوائر.

• 3 حبات بطاطس كبيرة متقطعة دوائر سميكة.

• ست فصوص ثوم متقطع شرائح.

• ملعقة كبيرة بهار مشكل.

• قرنين فلفل اخضر متقطع شرائح سميكة.

• معلقة صغيرة كركم.

• معلقة صغيرة ملح.

• زيت للقلي.

طريقة تحضير مقلوبة البطاطس

• اغسلي الرز وانقعيه في ميه بملح لمدة ربع ساعة.

• هتحطي ميه على النار لحد م تغلي وهتحطي معاها الفراخ و اول م تغلي هتشيلي الرغاوي وهتحطي الطماطم والبصل والملح والفلفل لحد م تستوي الفراخ وصفيها كويس واحتفظي بالمرقة هنحتاجها.

• هتسخني زيت وتقلي فيه قطع البطاطس لحد م يبقى لونها ذهبي فاتح وصفيها من الزيت على جنب.

• هتحطي البصل يتحمر وهتصفيه على جنب وفنفس الزيت هتحطي الفراخ اللي سلقناها لحد م تاخد لون ذهبي وتوزعي بينها وعلى جوانب الحلة وفوقها البطاطس وهتحطي قطع الفلفل والثوم عليهم.

• هتصفي الرز كويس وتحطيه عليهم يكون مغطيهم.

• هتغلي خمس كوبايات مرقة وتحطي فيهم البهارات والملح والفلفل والكركم وقلبيهم كويس وحطيهم على المكونات بهدوء عشان متحركيش الطبقات

• هتحطي المقلوبة على نار عالية لمدة عشر دقايق وغطيها وسيبيها على نار هادية لحد م يستوي الرز.

• اقلبي المقلوبة في طبق التقديم وزينيها وقدميها مع سلطه الزبادي والخيار.