طريقة عمل محشي ورق العنب
محشي ورق
العنب ده من اكتر المحاشي اللي ليها مكانة خاصة عند المصريين الكبار والأطفال
وليها مذاق خاص وأنواعه كتير تعالوا نعرفها سوا ونعرف ازاي نحضرها .
محشي ورق العنب
المكونات
- 2 كوب رز.
- نص كيلو طماطم ومعلقة صلصه .
- بصلة متوسطه .
- كمون وفلفل اسود وملح ومكعب مرقة وبهارات مشكلة وكزبرة ناشفه .
- بقدونس شبت كزبره خضره .
- ربع كوبايه زيت .
طريقه
تحضيره
- هتجيبي البصله وقطعيها مربعات صغيره وشوحيها في الزيت ولما تدبل هتحطي عليها نص كيلو الطماطم مفرومه وقرن فلفل شطه ومعلقتين الصلصه والكمون والفلفل ومعلقة كبيرة كزبره ناشفة ملح ومكعب المرقة وسيبيهم يتسبكو وتعالي نغسل الرز ونسلق ورق العنب .
- طريقة
سلق ورق العنب
- ربع كيلو ورق عنب لو طازه هتجيبي حلة فيها ميه وحطي فيها معلقه ملح وزيت وأول م تغلي حطي فيها ورق العنب يغلي مره واقلبيه على الناحيه التانيه يغلي كمان مره وطلعيه تكوني مجهزه جنبك حلة فيها ميه فاترة فيها حبه ملح وحبه زيت وأول م ورق العنب يهدى وكل السخنيه تطلع منه في مصفى صغيره سيبيه يتصفى .
- طب لو ورق العنب مش طازه ومجفف ؟
- هيكون سهل علينا خطوه السلق بس خلي بالك لازم تنقعيه وتغيريله ميه مره واتنين عشان ينزل كل المواد الحافظة اللي فيه وصفيه كويس اوي .
- اغسلي الرز كويس وضيفه على الصلصة اللي اتسبكت ومعاه الكزبرة والبقدونس والشبت واخلطيهم كويس وحطي طبقة من الطماطم والبصل بعديها رصي ورق العنب واسقيه مرقة سخنه تكون مغطيه وش ورق العنب وسيبيها على النار غالبا بتاخد ساعه تسوية على نار متوسطه وقدميه سخن .
ورق عنب باللحمه
المكونات
- 2 كوب رز .
- زبده.
- نص كيلو طماطم ومعلقتين صلصه.
- بصله متوسطه.
- كمون وفلفل اسود وملح ومكعب مرقة وبهارات مشكله (الكمية علي حسب الرغبة) .
- كزبره ناشفة.
- بقدونس و شبت و كزبره خضره .
- ربع كوبايه زيت .
- شرائح لحمه بوفتيك أو أي نوع بس تكون رقيقة .
- وربع كيلو ورق عنب.
طريقة تحضيره
- هتتبلي اللحمه بفلفل اسود وحبهان بودر وثوم بودر وبصل بودر وليمون وسيبيها فالتلاجه لحد م نخلص تجهيز ونسلق ورق العنب زي م قولنا فوق.
- خلطة الرز بقي هنعمل فيها اي؟؟
- هتجيبي البصله وقطعيها مربعات صغيره وشوحيها في الزيت ولما تدبل هتحطي عليها نص كيلو الطماطم مفرومه وقرن فلفل شطه ومعلقتين الصلصه والكمون والفلفل ومعلقة كبيرة كزبره ناشفة ملح ومكعب المرقة وسيبيهم يتسبكو وتعالي نشوح اللحمه .
- هتجيبي اللحمه اللي حطاها فالتلاجه وتشوحيها مع الزبده شويه لحد م تاخد لون مكرمل كده وتطلع الريحه القمر بتاعتها .
- الصلصه اتسبكت هتحطي معاها كوبين الرز والكزبرة والشبت والبقدونس ونقلبهم كويس اوي .
- رصي طبقات من الطماطم والبصل في قاع الحلة بعدها حطي اللحمة ورصي ورق العنب .
- واسقيه مرقة مغليه وسيبيه ع النار مش عايزين نفتح عليه كل شويه عشان اللون ميغمقش ويجلد مننا انتي بس اول م تلاقي تكتكة يبقا كده هو بيغلي .
- اول م التكتكة دي تقل وطي النار خالص وبعد م يعدي ساعه الا ربع من لما حطتيه عالنار ممكن تطلعي واحد تشوفيه استوى او لا .
- وممكن تستبدلي النار والحلة فأنك تعمليه طاجن وده اجمل دخليه فالفرن لمده ساعه لحد م يتشرب كل المرقة دي ويبقا كده استوى وطلعي واحد واتاكدي انه استوي كويس .
- هاتي فحمة صغيره مولعة وفي طبق صغير حطيها وحطي عليها زبده وحطيها على وش المحشي وغطي كويس لحد التقديم .
ورق العنب بالكوارع
المكونات
- رجل بقري متنضف ومتقطع صغير .
- بصله متقطعه مكعبات.
- ثوم مهروس.
- جزر متقطع مكعبات صغيره.
- حبهان وورق لورا ومستكة ملح وفلفل اسود وعصير ليمون.
محشي ورق العنب:
- نص كيلو ورق عنب.
- بصلة كبيرة متقطعه مكعبات صغيرة.
- 4 كوبايات ارز .
- كيلو طماطم (عصير) ومعلقتين صلصة.
- نص كوبايه زيت.
- حزمه شبت بقدونس كزبره.
- ملح فلفل اسود كمون كزبره ناشفة مكعبين مرقة شطة حسب الرغبه.
- شرائح جزر فلفل رومي وبصل.
طريقة التحضير
- اغسلي الكوارع كويس جدا وسيبيها في ميه سخنه خمس دقايق وكملي غسيل فيها.
- هاتي حلة فيها ميه اول م تغلي حطي فيها الكوارع والجزر والكرفس والبصل والثوم والحبهان وورق اللورا والمستكة وقبل م تستوي بوقت قليل حطي الملح والفلفل .
- طلعيها سيبيها تبرد وقطعيها مكعبات صغيرة مخلية .
- ورق العنب شوحي البصلة في الزيت ولما تدبل نزلي الطماطم عليها ومعها الصلصة والملح والفلفل الأسود والكمون والكزبرة الناشفة ومكعبين المرقة والشطة .
- وسيبيهم يتسبكو تكوني سلقتي ورق العنب وقولنا الطريقه بتاعت السلق فوق .
- حطي الرز والشبت والبقدونس والكزبرة متقطعين صغير .
- هتحطي حبة زيت في قاع الحلة لو هتسويها على النار أو قاع الطاجن لو حابة تعمليه
طاجن فالفرن وهترصي البصل والفلفل والجزر وهتحطي طبقه من ورق العنب وطبقة من
الكوارع لحد م تخلصي الكمية كلها واسقيها بالمغرفة بحيث تكون مغطية ورق العنب
والكوارع تماما وحطي عصير ليمون وطريقه التسوية زي م اتعلمناها في الطريقة اللي
فوق .
و بالهنا والشفا ,,,,,,,