🌺الذ الوصفات لعمل بسكويت العيد🌺
بسكويت النشادر من اشهر انواع البسكويت ، ومن زمان اوي واحنا بنشوف امهاتنا وجداتنا بيعملوه في الاعياد ، هنعمله مع بعض بشكل سهل وبسيط ، يعني لو لسة عروسة جديدة او بتتعلمي شغل المطبخ جديد يبقى المقال ده مفيد ليكي جدا .
المقادير
- هنشتغل بالكيلو ولو حابة بالكباية هاوضحلك برضه
- نص كيلو دقيق / كبايتين دقيق وممكن نص كباية لو احتجنا ، يعني حضريه احتياطي (500 جرام )
- ربع كيلو زبدة / كباية زبدة (250 جرام )
- 8/1 كيلو سكر / كباية سكر( 125 جرام )
- بيضتين + معلقة فانيليا
- معلقة صغيرة بيكنج بودر
- معلقة نشادر
- رشة ملح صغيرة خالص
الطريقة
- المكونات دي كلها جاهزة قدامك وكمان الوعاء اللي هتعجني فيه والصواني بتاعتك ،
- هنبدا بالزبدة والسكر بكل بساطة ونفضل نضرب بالمضرب الكهربائي او مضرب سلك يدوي او بايدك لو معندكيش أي ادوات لغاية منلاقي الخليط بقى هش خالص ، بعد كدا هننزل بالبيض والفانيليا والملح ، ونكمل ضرب ،
- هنجيب الدقيق ونحط عليه البيكنج بودر والنشادر وننخله كويس وننزل على الخليط بس مش مرة واحدة ، ياريت حبة حبة ونعجن ونشوف ليونة العجينة عندنا ، المفروض متكونش ناشفة ولا طرية اوي ، تكون معقولة ومتتعبكيش في التشكيل .
- التشكيل بيكون بمكنة البسكويت ودي متوفرة في معظم البيوت ولو معندكيش ممكن بايدك تعملي صوابع رفيعة وتشكليها بسن الشوكة او باي طريقة تحبيها .
- هتكوني مجهزة الفرن وتكون هادية عشان البسكويت ياخد راحته خالص في السوا وميتحروقش منك
👈وصفة تانية هتعجبك خالص
المقادير
نص كيلو دقيق
ربع كيلو سمن
ربع كيلو سكر
نص كباية لبن حليب
4 بيضات
معلقة صغيرة فانيليا
معلقة صغيرة بيكنج بودر
معلقة نشادر
ربع معلقة ملح
👈 الطريقة 👇
هتبقى شبه الطريقة اللي فاتت لاننا تقريبا مغيرناش غير اننا اضفنا اللبن ،
يعني هنبدا زي متعودنا بالزبدة والسكر ، هنضربهم كويس وننزل بالبيض والفانيليا ونكمل ضرب وبعدها ننزل باللبن ونكمل ضرب
هنجيب الدقيق والملح والبيكنج بودر والنشادر وننخلهم مع بعض وننزل على الخليط حبة حبة لغاية متحصلي على العجينة الممتازة بتاعتنا .
هتشكلي البسكويت وتخبزيه على نار هادية زي ماتفقنا .
وبالهنا