طريقة عمل البيتيفور الهش والناعم
عروستي الجميلة هتعملي البيتيفور بشكل سهل وبسيط ، تابعي معايا المكونات والطريقة وهتحصلي على بيتيفور ناجح جدا .
ملحوظة قبل ما نبدا نعمل البيتيفور :
- الدقيق لازم يكون لاغراض الحلويات .
- استعملي الزبدة البلدي او الصفرا وحاولي متستعمليش السمنة في البيتيفور
- الزبدة اللي هتشتغلي بيها متكونش متجمدة ، اوسايحة ، تكون في درجة حرارة الغرفة يعني لينة ينفع تشتغلي بيها عشان كدا هتغير كمية الدقيق اللي هتاخده سواء كانت متجمدة او سايحة .
- البيض يكون طازة ، هيفرق معاكي في النتيجة .
- السكر يكون ناعم .
- دلوقتي تعالي نشوف مع بعض المقادير والطريقة .
مقادير البيتيفور الهش
- كبايتين دقيق
- كباية زبدة لينة
- نص كباية سكر ناعم
- بيضة
- نص معلقة بيكنج بودر
- نص معلقة فانيليا
- ذرة ملح صغيرة خالص
- معلقتين كاكاو
الطريقة
- هنجيب بولة عميقة ونحط فيها الزبدة والسكر وذرة الملح ونضرب كويس اوي سواء بمضرب بيض كهرباءي او مضرب يدوي عادي ، المهم لازم لون الزبدة يتحول لابيض وتكون هشة خالص وكل السكر داب فيها .
- الخطوة التانية هتجيبي البيضة والفانيليا وتنزليها على الخليط وتضربي حبة .
- بعد كدا نجيب الدقيق والبيكنج بودر وننزله حبة حبة ونعجن بس بشويش .
- هتحصلي على عجينة جميلة اوي لينة وخفيفة وسهلة تتشكل بمكنة البيتيفور او المنقاش العادي .
- هتقسميها نصين ، هتسيبي نص ابيض والنص التاني هتحطي عليه معلقتين الكاكاو وتخلطي ، فيبقى عندك عجينة بيضا وعجينة بني .
- هتجيبي مكنة البيتيفور وتحطي عجينة بيضا وتشكل زي مانتي حابة في الاشكال ، ومرة تنزلي عجينة بني ، وفيه فكرة تانية ، انك تجيبي عجينة بيضا وتعمليها اسطوانة رفيعة وجنبها عجينة بني وتحطيهم جنب بعض في المكنة فينزل قطعة بيضا وبني.
- اعملي اللي انتي حاباه في التشكيل ، بعد ما تخلصي كل الكمية وتملي الصواني اللي عندك ، هنكون مجهزين فرن حرارتها متوسطة متكونش عالية لان البيتيفور من الحلويات الحساسة جدا ولازم تاخدي بالك في السوا وتخلي الوش ابيض مياخدش لون .
بعد السوا فيه تكات جميلة تقدري تعمليها زي :
- تجيبي مربي وتلزقي كل قطعتين متشابهين ببعض ، او تلزقي قطعة بني وقطعة بيضا .
- تجيبي جوز هند او فورماسيلا وتغطي كل الحيفان اللي طلع منها المربى .
- ممكن لو مش بتحبي المربى ، تلزقي بعسل نحل .
- ممكن تسيبيه سادة كدا من غير أي اضافات وتاكليه او تقدميه مع الشاي ، هيبقى جميل اوي .