وصفات بيض سهلة وسريعة
لكل عروس محتارة تحضر البيض ازاي لانها لسة جديدة في المطبخ .
عزيزتي حضرنا لكي اسهل واشهى الوصفات هتستمتعي وانتي بتحضريها .
1. بيض مسلوق
ودي اسهل طريقة لتسوية البيض :
كمية البيض اللي هتسلقيها بس خدي بالك لو كان البيض في التلاجة يبقى تسيبيه شوية برة قبل متسلقيه عشان ميتكسرش منك ، بعد كدا هتجيبي الاناء اللي هتسلقي فيه البيض وتحطي فيه مياه ومعلقة ملح وترفعيه على النار الى ان يغلى وتنزلي البيض بس بشويش ياعروسة .
لو عايزاه نص سوى يبقى هتسيبيه 6 دقايق على النار ،
لو عايزاه لين حبة ، يبقى تسيبيه 8 دقايق ,
لو بتحبيه شبه صلب يبقى تسيبيه 10دقايق
اما بقى لو بتحبيه مستوي خالص يبقى تسيبيه 14دقيقة
بعدها ترفعيه من على النار وتبرديه بالمياه وتقدميه كوجبة فطار غنية بالبروتين وفوايد تانية كتير .
2 . شكشوكة بيض بالبطاطس
ركزي معايا هي وصفة سهلة خالص .👌
المكونات
- حبة بطاطس متقطعة مكعبات صغيرة
- 4بيضات
- بصلة كبيرة متقطعة زي البطاطس
- ملح وفلفل اسود حسب الرغبة
الطريقة
هترفعي طاسة فيها زيت على النار وبعد مالزيت يسخن هتنزلي البطاطس وتحركي لغاية متبقى طرية معاكي ، بعدها هتنزلي بالبصلة وتقلبي مع البطاطس لغاية ميبقو البطاطس والبصل لونهم دهبي ،
هنجيب البيض ونخفقه في طبق لوحده وبعدا ننزل بيه بشويش على الخليط اللي على النار ونقلب مع تظبيط الملح والفل وتفضليتقلبي مش اكتر من 5 دقايق ، هتحسي ان البيض فعليا استوى وتدوقي الطعم وتطفي النار وتقدميه . بالهنا والشفا .
3. بيض عيون
لنجاح بيض العيون والحفاظ على شكل البيضة الجميل اللي بنشوفه في الصور ، لازم تبقى الطاسة بتاعتك تيفال او سيراميك ومتكونش الومنيوم او تيفال متجرحة عشان ممكن تلزق معاكي ومش هتطلع مظبوطة ,
هتحضري طاسة متوسطة الحجم وتدهنيها زيت وترفعيها على النار بس خلي النار هادية ،
هتجهزي 4 بيضات في طبق بس بشويش عشان يحتفظو بشكلهم ومتختلطش الصفار مع البياض ،
هتنزليهم بشويش في الطاسة وهي على النار وتهدي النار خالص ,
لو مش حابة تقلبي البيض وعايزاه يستوي بالشكل اللي هو عليه ، يبقى تغطي الطاسة بس تلاحظيها من الوقت للتاني .
بعد مايستوي ويوصل للدرحة اللي بتحبيها سواء كان نص سوى ،او طري ا،و سوى كامل ، هتطفي النار وتنقليه في طبق تقديم وترشى حبة ملح وفلفل حسب الرغبة .
4. قرص العجة
دي اكلة جميلة وتقدري تشكلي فيها مكونات اد متقدري :
المكونات
- 4 بيضات
- شريحتين لانشون حلواني و ممكن 100 جرام لحمة مفرومة لو مش حابة اللانشون ، ولو امكن وكان عندك بسطرمة يبقى كويس خالص
- حبة طماطم متقطعة
- قرنين فلفل احمر مقطع صغنن
- قرن فلفل اخضر برضه متقطع
- مثل جبنة او جبنة شيدر او رومي حسب الرغبة
- ملح وفلفل وكسبرة
الطريقة
- هنخلط كل المكونات السابقة مع البيض ونقلب كويس لغاية مكل لمكونات تمتزج معانا ،
- هنكون مجهزين طاسة تيفال وداهنينها زيت وبعد ماتسخن على النار هننزل كل الخليط ونهدي النار ونغطي الطاسة ،
- شوية كدا وتشوفي لو كانت احمر الجنب السفلي هتعملي ايه بقى ؟
- هتجيب طبق نفس مقاس الطاسة وتقلبيه على الطاسة وتمسكي الطاسة بس اوعي ايدك تتلسع ،
- وتقلبيها في الطبق وترجعي الطاسة تاني على النار وتمسكي الطبق اللي فيه الخليط تنزليه بشويش في الطاسة ، بكدا انتي قلبتيها من غير متبوظيها .
- هتسيبها تستوي كويس وكل شوية تنزلي سن شوكة فيها ، لو طلعت نضيفة يبقى كدا تمام تطفي النار وتقدميها في طبق تقديم .
ملحوظة 👇
5. بيض مخفوق بالسمن البلدي
الاكلة دي مشهورة اوي في الصعيد المصري وهي سهلة وسريعة
هتخفقي البيض ايا كانت الكمية وتنزليه على سمن بلدي او زبدة بلدي في طاسة على النار وتفضلي تقلبي لغاية متوصلي للمستوى اللي انتي حاباه في النضج ، طري او سوى كامل .
بعد مايبرد بتجيبي جبنة قديمة او مش فلاحي او جبنة قريش حسب الطلب ، وتقلب كل الخليط مع بعضه . الاكلة دي بتبقى حلوة اوي بالعيش الفلاحي او الفطير المشلتت .