نصائح منزلية للعروسة الجديدة

 

نصائح منزلية للعروسة الجديدة

لو انا متجوزة جديد ولسة راجعة من شهر العسل ارتب بيتي ازاي ؟

دايما بتقابلنا اسئلة من النوع ده ان حد من قرايبك او اصحابك متجوز جديد وبتشتكي من حياتها الجديدة خاصة لو كانت قبل الجواز مش بتعمل حاجة في البيت مع مامتها وجات بعد الجواز فوجئت بمسئوليات هي مش مستعدة لها ,

طب ممكن نعمل ايه هنعرف مع بعض من خلال الخطوات اللي جاية :

في البداية لو انتي عروسة جديد هتقابلي التالي , بيت عايز يترتب , كمية اطباق عايزة تتغسل , راجل عايز ياكل وممكن يطلب اكل انتي اصلا متعرفيهوش , حاجات كتير زي كدا هتخليكي تايهة ومتوترة ومش عارفة تبدأي منين  , الموضوع يبدو انه مدمر لكن بشوية تكات زكية منك هتخلصي كل الشغل ده في وقت قياسي 

  لازم تشتغلي بمبدأ الجداول ، يعني ايه ؟

هتعملي جدول يومي واسبوعي وشهري وسنوي :

اولا :الجدول يومي :

• هتصحي من النوم اول حاجة تعمليها ترتبي السرير ,

• وتفتحي الشبابيك لازم الاوض تتهوى .

• تدخلي الحمام وتاخدي شاور وتحطي معطر وتستعدي ليومك بكل حيوية وطاقة ايجابية

• هتشغلي حاجة تسمعيها تكون حلوة بتحبي تسمعيها ياريت متكونش هادية احنا عايزين حاجة فيها حركة كانك في جيم

• احنا هنشتغل مش هنسترخي  😃😃😃😃😃

• هتحطي في الجدول كمان الكنس وتنفيض الغبار بشكل سريع

• كمان غسيل المواعين يا مزة , لازم تحطيها في الجدول اليومي لانك مش هتبيتي أي مواعين في المطبخ

• مسح الاسطح والازاز او الترابيزات من الغبار برضه في الجدول اليومي

• الغسيل طبعا لو عندك غسالة اوتوماتيك مثلا هتغسلي اول باول متخليش الغسيل عندك يتراكم

• مع الوقت انتي نفسك هتحطي حاجات وتشيلي حاجات من الجدول بس دلوقتي كفاية عليكي دول.

ثانيا : الجدول الاسبوعي :

هتكتبي فيه كل الحاجات اللي هتعمليها كل اسبوع عشان متنسيش وكمان تبقى دنيتك متظبطة

 زي تنفيض السجاد

تغيير ملايات السرير ودي ممكن تبقى اكتر من مرة خلال الاسبوع

البقالة اللي هتشتريها من السوبر ماركت

تنضيف الشبابيك من برة وجوة

ثالثا :الجدول الشهري :

هنا هتشوفي الحاجات اللي تتعمل كل شهر زي :
ترتيب الدولاب كله من جديد
ترتيب الخزانة
ترتيب المطبخ من جديد وتغيير الاماكن , ده هيديكي احساس بالتجديد
تفريغ النيش ومسحه وترتيبه من جديد
تغيير مكان الانتريه والسفرة لو تقدري وعندك مساحة لكدا كنوع من التجديد
مسح المراوح والتكييف والنجف والتحف بس حاولي متكسريش حاجة 💪💪
مع الوقت برضه هتحطي مهام وتشيل مهام لانك هتبقي فهمتي الدنيا كويس

رابعا : الجدول السنوي :

غسل السجاجيد 

والستاير 

والبطاطين 

واللحاف 

والدورابية  وممكن  تغسليهم اكتر من مرة في السنة.

ده بخصوص الجداول .

نيجي بقى ليومك العادي :

"فاكرة لما قلنا هتاخدي شاور قبل متبداي ؟" ☝☝

• اوعي تسيبي الحمام بدون متنشفيه كويس وتحطي دايما فيه مادة عطرية وتفتحي الشفاط لو فيه او الشباك عشان يكون متجدد التهوية ياستمرار , كمان ياريت تغسليه كله مرتين في الاسبوع على الاقل .

• متسيبيش أي علب فاضية في الحمام زي علب شامبو او بلسم او أي منظفات , اتخلصي منها علطول ومتكسليش وخلي حمامك مترتب ونضيف وناشف دايما .

• خلصنا الحمام نيجي للمطبخ , هتعملي فطار ليكي وللعريس 💕💕, حافظي على النظام ولو هو حابب يساعدك . ياريت تخليه يمشي على نقاط اساسية من البداية زي ,أي حاجة يستخدمها يرجعها مكانها ,بس طبعا هتكوني لطيفة لما تديله أي اوردر بلاش تتامري عليه لانهم ميحبوش كدا 😻. 

• رتبي مطبخك قبل متطلعي منه ,كل حاجة مكانها . هتطلعي تفطري في السفرة مش اوضة المعيشة , فاهمة ؟

• لو اتعودتي على حاجة من البداية اصبحت نظام خلاص ومش هتتعبي بعدين خاصة لما ربنا يكرمك باولاد 👪ويشوفو النظام ده قدامهم .

• بعد أي وجبة اغسلي الاطباق علطول زي مسبق وقلنا ☝.

• كمان مترميش الهدوم في كل مكان ياريت ترتبي سلة الغسيل في مكان ثابت ومعروف , لو دخل ضيوف في أي وقت تبقى كل حاجة عندك تمام .

دي اساسيات هتتعلميها وانتي متجوزة جديد ونظام لو اتبعتيه هتستمتعي بيومك وبحياتك , ومش هيكون فيه عليكي أي اعباء .