نصائح بداية مشروع

نصائح بداية مشروع

اهلا بيكي حبيبتي هنكمل مع بعض فكرة المشروع المنزلي اللي بدأناه في الحلقة اللي فاتت .

شوية نصائح في بداية المشروع عشان تبقي كل دنيتك تمام و متقعش منك اي حاجة في الطريق وتكوني فى مشروع ناجح .

طبعا بيتك واولادك ودنيتك مش هيتنسو في الطريق .

فياريت نركز خاصة لو لقيتي مكسب من الموضوع ورغبتك في استكمال سلسلة نجاحاتك واثبات وتحقيق ذاتك وكيانك .

انتي دايما القائد ومسؤولة عن ترابط كل خيوط سفينتك عشان متغرقش

بمعني ،،،،،،،

النقطة الاولى :

لازم الطرف الثاني اللي متواجدة معاه يكون مقتنع بالفكرة سواء كان باباكي لو انتي انسة او جوزك لو مدام ، لو هو مقتنع هتلاقيه بيشجعك جدا وواقف في ضهرك وساندك لان نجاحك نجاحه فكوني ذكية واكسبيه لصفك في النقطة دي وقبل ما تعملي اي حاجة خدي رايه واقبلي اقتراحاته وحسسيه انك محتاجاه عشان تنجحي وانه صعب تنجحي بدونه لانه رفيق العمر والكلام ده حقيقي مش مجرد بتصحكي عليه بكلمتين لا انا مقصدش ده .

النقطة الثانية :

 في حالة انه وافق والدنيا تمام بينكم هتبدأي تقسمي وقتك وتركزي ان فيه شغلك وشغل البيت والاولاد واهمهم طبعا جوزك .

هتعملي جدول زمني باولوياتك وايه الاهم ثم المهم ثم الاقل اهمية ، بكدا انتي هتفضلي دايما في القمة .

النقطة الثالثة : 

كمان قبل ما تبداي مشروعك لازم تشوفي موضوع المسوقين اللي هيسوقو لك المنتج عشان تبداي صح واوعي تعملي حاجة انتي مش عارفة الخطوة اللي بعدها اوك ؟؟

النقطة الرابعة : 

كمان في المنطقة اللي انتي فيها هتسألي ايه اكتر حاجة مطلوبة وتركزي علي اكتر حاجة بتحبها الاطفال وبتتباع كتير و ايا كانت انتي لو حطيتي الموضوع في دماغك بانك هتنجحي فيه ، صدقيني هتنجحي .

النقطة الخامسة : 

النقطة دي مهمة ، اي مشروع تبدايه عايز شوية صبر وطول بال محدش بيزرع وتاني يوم يحصد ، اكيد بنزرع والحصاد بييجي في وقته المهم يكون عندك ايمان ان تعبك مش ممكن يروح هدر ابدا لازم ربنا هيعوضك وكل واحد فينا وله رزقه وفى الاخر هتحصدي اللي تعبتي فيه خاصة لو عاملاه بحب وحسن نيه .

بالاضافة الي الصبر فيه نقطة تلنية ناخد بالنا منها ايه هي ؟؟

اننا مننطش من مشروع لمشروع او نفتح كذا مشروع مع بعض ، ركزي في حاجة معينة عشان تعرفي كل ابعادها وتعرفي كل خبايا المشروع ومقومات نجاحه مثلا زي الكيك كل ما تعملي اكتر وتبيعي ، كل مرة هتكتشفي حاجة وتركيزك ده واصرارك علي النجاح هيخليكي تنجحي فيه .

بعكس لو مسكتي كذا حاجة مع بعض ، هتلاقي نفسك غرقانة ودايما مرهقة ومطلوب منك اكتر من حاجة في نفس الوقت ، صدقيني كل مجهودك هيضيع بدون فايدة فالافضل نركز في حاجة واحدة ، وبعد ما ربنا يكرمك ومشروعك يكبر تقدري تكوني فريق مع اقاربك وحبايبك يساعدوكي وتكسبي واكسبي اللي حواليكي .

في الحالة دي لو عندك وقت تقدري تعملي حاجة تانية او مشروع تاني جنب مشروعك الاساسي اللى ركزتي عليه ونجحتي فيه .

لكن في البداية بلاش اي تشتيت لمجهودك وطاقتك ركزي في حاجة واحدة بس ولما تنجحي فيها وتكوني جبتي اخرك فيها من النجاح تنتقلي لتوسيع مشروعك بمشروع تاني ويفضل تكون كل المشاريع فيها ترابط وحاجات مشتركة عشان تشهر بعضها .

نقطة كمان لازم نتكلم فيها :

عشان توصلي للقمة لازم تطلعي كل السلالم ، بمعني انه فيه تدرج في الموضوع تبدأي بحاجة بسيطة ومع الوقت هتكبر معاكي، لكن بلاش النطة المفاجأة ، او انك تعملي حاجة بإمكانيات كبيرة ، او انك تخطي خطوة اوسع من اللي عندك.

واخر نقطة وهي بالنسبة لي مهمة جدا ، وهي ان اي حاجة تعمليها بحب لازم تنجح ويكون فيها بركة جامدة من ربنا لانك تعبتي فيها وربنا مش بيضيع مجهود حد .

حبيت اتكلم معاكم في بعض النصائح بعد فكرة مشروعنا اللى اتكلمنا فيها المرة اللى فاتت عشان نبدأ صح ولا نيأس في بداية الطريق .

الى كل فرد من عائلة " شئ قوي " للحديث بقية ... الي اللقاء