طريقة عمل صوابع زينب بالصور والخطوات
نكمل مع بعض مشروعنا الصغير اللى بيكبر كل يوم ان شاء الله .
النهاردة بقي هنشوف اكلة حلوة والاطفال بتحبها اوي وكلنا عارفينها اسمها
صوابع زينب 😋.
هنعملها بمكونات بسيطة وغير مكلفة وهتعمل معاكي كمية حلوة .
يلا نشوف الطريقة :
· " اول حاجة
تجهزي الشربات بتاعك وتبرديه " .
المكونات :
- ٢ كوباية سكر .
- ١ كوباية مياه .
- عصير ليمونة واحدة و فانيليا او بدون براحتك .
الطريقة :
- هتحطي كل ده في اي حلة علي النار وبعد غلوتين كدا او لونه يبقي اصفر فاتح نطفي النار ونسيبه يبرد .
- وبعدها نجهز مكونات الاكلة بتاعتنا .
- هتشتري كيس سميد اللي هو دقيق بسبوسة وتاخدي من كوباية واحدة بس وتشيلي الباقي لمرة تانية او اكلة تانية .
- وبنفس الكوباية هتمليها ٣ مرات دقيق عادي بس يكون فاخر .
- وهتجيبيى ملعقتين خميرة فورية وذرة ملح وملعقة سكر وماء حسب متطلب معنا .
هنبدا ازاي بقي ؟؟.
- اول حاجة هنحط الخميرة والسكر والملح في نص كوباية مياه دافية وندوبها كويس .
- وبعدها هنجيب الدقيق ونخلطه علي السميد ونحط المياه والخميرة عليه ونعجن كويس .
- المفروض متكونش طرية اوي ولا ناشفة اوي تبقي كدا شبه عجينة البيتزا او الفطاير .
- بعد كدا هتقطعيها كور صغيرة اد الليمونة الصغير كدا .
- هنجيب اي حاجة فيها اشكال بارزة زي منخل سلك او مصفاه ، او لو مفيش اي حاجة هتجيبي ورقة كارتونة وتشيلي الطبقة العلوية هتلاقي تحتها اضلاع هتنفع نشكل بيها .
- هنفرد الكور علي الجسم اللي جهزناه وبعدها نلمها فهتبقي صباع صغير كدا وحلو .
- ونخلص كل الكمية نسيب مسافة بسيطة بين
كل صباع واخوه لانه هيخمر ونغطي الصينية ونحطها في مكان دافي تقريبا
ربع ساعة .
بعد كدا هنعمل الاتي
- هنجيب الشربات البارد بتاعنا ، ونجيب العجينة اللي اختمرت..ونجهز زيت علي النار في وعاء نضيف وبكمية وفيرة .
- ونبدا نحط الصوابع بتاعتنا ونهدي النار ونقلب لحد ميلقي لونهم ذهبي وحلو .
- اول ما يلون معانا ويبقي حلو هنطلعه علي اي ورق نضيف او مناديل ورق عشان نصفي بواقي الزيت وبعدها علطول نحطه في الشربات ونتاكد انه اتغطي تماما .
- هنطلعه من الشربات ونحطه في مصفاية تحتها وعاء عشان الشربات الزيادة ميضيعش خسارة ، ونكرر الكلام ده لحد منخلص الكمية .
" ملحوظة
مهمة ليكي "
حاولي توحدي حجم كل الكور بتاعة الاكلة لانك هتبيعيها ولازم يكون
مقاسها مظبوط .
كمان ياريت لما تشيليها في التلاجة نغطيها باستريتش وده بيبقي بلاستيك
شفاف وهتحتاجيه كتير في شغلك فاشتري من بكرة كبيرة وشيليها عندك زي اللى في الصورة
دي . 👇👇👇
بكدا خلصنا اكلة النهاردة . ✌
ركزي 👀 النضافة اهم حاجة في المنتج والحلويات حساسة جدا لاي روايح يعني
ابعديها عن روايح بصل او توم او برفانات .
ربنا يوفقك ان شاء الله ويكون سبب رزق ليكي 🙏 .
نتقابل الحلقة الجاية ان شاء الله 💗.