كيف تبدأي حياة زوجية سعيدة
هذا المقال مفيد اكثر اذا كنتى مقبلة على الزواج أو لسه عروسة جديدة وفى شهر العسل ، هنتكلم مع بعض في نقاط اساسية ومهمة جدا اللى تقدرى بيها تحققي السعادة الزوجية وحاولى تركزى اكثر معايا واختارى من النقاط دى ما يناسب قدراتك واللى تقدرى انك تنفذيه :-
كوني انتى وليس احد آخر :
انتى كأنثى لكِ كيانك, وتفكيرك, و آرائك, و وجهة نظرك المختلفة بالطبع عن الآخرين ، لازم تحافظى على هويتك ومتخليش اى حد يؤثر على قرارك أو ارائك خاصة الأصدقاء أو الأقارب .
زوجك رقم واحد في حياتك :
باستطاعتك ان تضعي أساس قوى لبيت ناجح مدى الحياه لو كان أساسك صحيح ؛ بمعنى ان لازم زوجك يلاحظ انه رقم واحد في حياتك مع الاحتفاظ طبعاً بحبك لاهلك ، واحترامك الشديد ليهم ، لكن بمجرد خروجك من بيت اهلك ودخولك بيت زوجك عليكي وضع قوانين انتى مقتنعة بيها جداً، القوانين دى اللى هتمشى عليها دايما، اهمها ان جوزك أهم الموجودين في اى مكان ده هيخليه يحترمك جدا ويخليه يفكر كويس انه يضعك انتِ رقم واحد في اولوياته بالطبع .
كونى ساحرة دائماً :
الانثى هي الانثى سواء عروسة ، او ام، او ست بيت ، او حتى جدة ، عليكي ان تكوني انثى في تصرفاتك ، صوتك ، اناقتك ، طريقة جلوسك ، احترامك لاهل جوزك .
تذكرى دائماً أن ما تصنعيه اليوم لن يُنسى غداً :
عايزاكي تنتهزِ فرصة انك بتصنعي تاريخ مش هيتنسى لازم تفتخري بيه دايما زى :-
1- محبتك لاهل جوزك :
- طبعا لازم تنادى باباه ومامته ببابا وماما ، بس تحبيهم فعلا من قلبك مش مجرد تناديهم باللقب وبس ، ولو مش قادرة تحبيهم من قلبك افتكرى انهم هما اللى جابوا لك اجمل هدية ليكي وهو جوزك ، فبدل ما يحسوا انهم خسروا ابنهم خليهم يشعروا انهم كسبوا ابنة جديدة .
· 2- بادرى انتى بالمساعدة دائما :
- جمال روحك وتواضعك ومساعدتك لاهل جوزك هيخلى جوزك يحبك اكتر و اكتر ومش هينسى الحاجات الحلوة دى ، ومتنسيش زى ما انتى حلوة مع اهله، هو كمان هيضطر يكون كويس مع اهلك.
العصبية :
انتى طبعا عارفة ان العصبية بتقلل اوى من قيمة نفسنا ، فانا عايزة اقولك اوعى تتعصبى لدرجة نوصل بيها اننا نتفوه بلفظ خارج أو شئ نندم عليه بعدين، لان الكلمة في صدرك تملُكها واذا خرجت ملَكتك ، فكرى نفسك دايما انك "اميرة" في هذا المنزل ، ومش دى اخلاق الاميرات ، وتعاملى دائما على هذا المبدأ .
كونى ايقونة للي حواليكي :
انتى جديدة وفى عيلة جديدة لها أفكارها وعاداتها وتقاليدها ، وانتى كمان عندك أفكارك ومبادئك وتقاليدك اللى مش هتقدرى تغيريه ، طب هتعملى ايه ؟؟؟؟
لازم تعملى ارضية قوية من الحب تخلى الكل يحبك ويحترمك بسبب اسلوبك و رقتك وتواضعك وبكده تقدرى تغيرى افكار ممكن متكونش مناسبة ، بس مش بالوعظ لا ، بتقليدك انتى ، لو حبوكِ هـ يعملوا زيك .
قائمة اصدقائك :
في رائى الشخصى لازم قائمة اصدقائك تتقلص وتتبقي صديقة على الأكثر تثقى فيها، ومش اى حد تدخليه بيتك ، اصدقائك تخلى في حدود دقيقة وبشكل رسمى جدا ، لان حياتك اتغيرت ولازم تعيشى الحلم الجديد وتحبيه .
اسرارك ليكي مش لحد تانى :
اياكى تتكلمى عن حاجة خاصة بيكي او بجوزك مع صديقتك او قريبتك ، وتعري خصوصيات حياتك
"خليكي حكيمة" وبصي لبكرا ، متبقيش ساذجة واى حد يسألك اى حاجة تجاوبي كده عادى .. لا غلط تماماً، افتكرى انك اميرة ، والاميرات مش بيحبوا الرغى والثرثرة اللى ملهاش لزمة ولا ان حد يعرف عنهم حاجة .
كفاية عليكي كده النهاردة فى بعض النقاط اللى اتكلمنا فيها لـ حياة زوجية سعيدة ، وهنكمل موضوعنا المرة الجاية .