خطوات بها تكونين ساحرة لزوجك | أزاي اكون ست بيت شاطرة

خطوات بها تكونين ساحرة لزوجك | أزاي اكون ست بيت شاطرة

هنكمل موضوعنا اللى بدأناه ..... من ضمن سلسلة " حياة زوجية سعيدة " .

طبعاً فهمنا أزاي تكسبي حب اهل جوزك وتكوني انسانة حكيمة في تصرفاتك وسلوكك اللى هيكون زي الاميرات و لو لسه مقرتيش الموضوع ممكن ترجعي وتقريه تانى من هنا .

النهارده موضوعنا هيكون دقيق اكثر لانه خاص بعلاقتك مع جوزك .

هعرفك الاول عناوين بس ازاى بيها تكونى دايما متألقة من اول يوم جواز وبعدها لحد ما تبقي جده ان شاء الله مش بس ماما .

اول حاجة :

اوعي تنسي انك انثى ، والانوثة يعني كل حاجة حلوة الراجل لازم يشوفها فيكي .

حاولي تفتكري لما كنتي مخطوبة ايه الحاجات اللي كنتي دايما بتعمليها من ميك اب وتسريحة شعر وبرفيوم وكل ده ميروحش بعد الجواز ، فحاولي تكملي كده ، متتخليش عن اناقتك لانها جزء منك مش بتعملي كده عشان حد وخلاص .(هي مش جبر خواطر ، لا طبعاً ) .

من اول يوم في الصباحية :

 اول حاجة لازم تاخدي  بالك منها في كل يوم يوم الصبح الشاور بتاعك ،  برفانك جزء منك واختيارك لنوع البرفان له تأثير طبعا على الزوج خاصة لما يكون فيه نوع هو بيحبه جداً ، بس ركزي مش برفان وبعدها تمسكي حاجة في المطبخ ، لا حاولي تخلي البرفان بعيد عن ايدك عشان الاكل او المشروبات .

ميك اب make up :

وشك وجمال بشرتك مهم جداً تعملي ميك اب خفيف وسريع مش ساعة طبعا قدام المرايا .

هتحطي حاجة ينفع تكملي بيها اليوم زي ( كحل + أي شادو + بلاشر + روج ) ، بلاش تحطي فونديشين وانتي في البيت ، وبلاش مسكرة لانها هتبوظ من المطبخ وبلاش أي لاينر لأنه هيسيح منك من شغل البيت .

تسريحة شعرك مهمة جداً ، يعني نصيحتى ليكى الغى من قاموس حياتك حاجة اسمها ايشارب او طرحة وانتي في البيت عشان ميحسش انه واخد خالته ، يعني انتي حلوة كده ، خليكِ دايما حلوة ، واعملى كل حاجة و انتي كده وبشويش تخلصي شغل البيت وانتي مازلتي انيقة .

نضافة جسمك :

جسمك لازم يكون نضيف باستمرار ، وطبعا فاهمانى لازم تكوني مستعدة ، مثلاً اجهزة البيوتي كير عندك، او زي جهاز ازالة شعر او سويت او كريمات ، ولو مفيش كل ده يكفي اهتمامك بنظافة جسمك دي مهمة جدا وبتفرق جامد وانتي نضيفة برضو عشان نفسك مش عشانه هو وبس ، وكمان عشان ميحسش انه واخد عم عبده البواب .

ازاى تخلى جوزك اطول فترة ممكنة في البيت :

عشان تخلي جوزك أطول فترة ممكنة في البيت ، خليكي ذكية و اوعى تكفري سيئاته بمعنى ، لو جوزك مش بيحب الكلام الكتير وده تقريبا طبع كل الرجالة بلس انك لازم مترغيش كتير ، حاولى معلش انا عارفة انها صعبة على أي ست انها تسكت وتقلل كلام ، بس اهو نضحي بحاجة عشان حاجة اهم ، لما يكون كلامك قليل وعميق وفي حاجة مفيدة هيتكلم معاكى ويحس انك صاحبته مش غفير عليه ، أو ولي أمره .

الثقة فى قدراته وإمكانياته :

نقطة مهمة جداً ، وهي انك لازم تثقي في امكانياته وقدراته جداً ، وتشجعيه في شغله وتحسي بتعبه وتوصلي له احساسك ده ، مهما كان شغله بسيط ، النقطة دي بتفرق جامد اوي ووقتها بيحس انك سنده فعلا ومصدر تحفيز له ، كلنا محتاجين التشجيع والكلام الايجابى ، سواء كان راجل او ست ، لو فهمتي كلامي كويس ونفذتيه جوزك مش هيمل منك ابداً وهيفضل شايفك مصدره والركن المهم اللي في حياته اللى لازم يلجئ له في كل موقف .

خليكي دايما وراه مش قدامه :

احياناً بتكون المرأة اذكي من زوجها ، بس ذكائك الحقيقي انك متخليهوش يحس بكده ، لان الراجل عنده كرامة وكبرياء ، وانتي اكيد مش هترضي تكسري الكبرياء ده ، خليكي دايما وراه مش قدامه .

لو فيه وجهة نظر معينة عايزة توصليها له ، فكري معاه لحد ما يوصل هو للي انتي عايزاه من غير ما تحسسيه ان هو ده قصدك من البداية .

حماتي :

ناس كتيرة بتسأل كيف اتعامل مع حماتى ؟ ، اياكي تشتكيله من مامته مهما حصل ، ركزي كويس ... لو فعلاً انتى واثقة من نفسك ومن قدراتك اتحدي نفسك ووفكري ازاى تخلي ماما حبيبك حبيبتك " حماتي حياتي " ، وبدل ما تكون حماتك تخليها امك بذكائك يعني ، وانتي كمان هيجي يوم هتبقى فيه ام ، وهتيجي واحدة وتعمل معاكي اللى انتى عملتيه في حماتك، فياريت تحسبيها صح .

الحب :

الحب زرعة وده بستان ، واللى تسقيه بالحب ده عشان ميموتش هو الاحترام .

خلي حبك دايما حي باحترامك لزوجك في كل موقف حتي لو هو غلطان فيه ، لانه بطريقتك هيعرف انه غلطان وانك احتويتي الموقف بسبب احترامك له ووقتها هيفكر الف مرة قبل ما يغلط وهتزيدي اوي في نظره ويعرف هو متجوز مين وايه العقلية اللى هو عايش معاها .

للموضوع بقيه ,,,,,,,, .

اقرأ ايضا عن  كيف تبدأين حياه زوجية سعيدة