• اساسيات التعامل مع اطفالنا في سن مبكرة 👪👪 ِِ

اولادنا هم ثروتنا الحقيقية التي يجب الاهتمام بها , هناك عدة امور للاسف كثير من الاباء والامهات يجهلها تماما في التعامل مع الاطفال في سنواته الاولى , هنحاول نقول بعض منها النهاردة .

1-  1 .. ياريت منصرخش في وش الطفل واحنا بنكامه في أي مشكلة او خطا احنا شايفينه كبير , لان ده بيربي جواه الخوف وعدم الاحساس بالامان , ويكبر وتتحول لازمة او عقدة هيعاني منها كتير بعدين , غير طبعا هيخليه غير واثق في نفسه , واي قرار هياخده مش هيبقى واثق من صحته .

2-  2.. لما تيجي تتكلم مع ابنك او بنتك ياريت يكون وجها لوجه يعني لاحظ فرق الطول بينكم , هو طبعا مش هيقدر يطلعلك عشان يشوف عينيك ولغة وشك وانت بتتكلم , لكن انت تقدر تنزل لمستوي جسمه وتبص في عينيه اثناء الكلام , بتفرق معاه جامد لما يحس انك نزلت على ركبتك وانت بتكلمه عشان خاطر تبصله وتسمعه ويسمعك , وبكده مش هيحس بالدونية او خوف , زي وانت واقف بطولك طبعا كانك هيراكل  😈

3-3..   ياريت وانت بتكلمه , تكلمه باسلوب بسيط وتحاول تنزل لمستوى تفكيره وعقليته وتحاول تتخيله عالمه الخاص وانت بتتناقش معاه لانه بالفعل هو ادراكه للاشياء مختلف عننا تماما , فبسطله الكلام والمفردات عشان يقدر يفهمك .

4-4..   نقطة مهمة جدا وقد تكون كارثية لما نيجي نخوف الطفل بالعفاريت او الخرافات اللي كنا بنسمعها واحنا صغيرين , ليه بقى كارثية ؟؟؟ لانه هيكبر ويكتشف اننا كنا بنكدب عليه وبكداه تتدمر عنده الثقة وممكن ميصدقش أي حد بعدين .

5- 5..  بلاش الكدب على الطفل ابدا او توعده وعد ومتنفذهوش , بجد يعني دي حاجة بتجرح شعوره جدا وبنقل في نظره وكلنا حسينا الاحساس ده , فياريت نستفيد من طفولتنا ونحاول نفتكر لما تيته او بابا او أي حد غالي علينا وعدنا بهدية او وعدنا بمكافئة مقابل حاجة نعملها مثلا او مقابل واجب نكتبه , وبعد مخلصنا مهمتنا اكتشفنا انهم بيضحكو علينا . ياخبر حاجة صعبة جدا على نفسية الطفل ولازم نلركز ان الطفل مش بينسى ابدا الحاجة اللي جرحته , فبلاش نكدب عليهم نهائيا , يعني نوعد بحاجة فعليا هنقدر ننفذها , ياما منوعدش اصلا .

6- 6 .. نرجع لنقطة الحوار , لازم نلتزم بصوت هادي متزن اثناء الحوار , يعني نعتبره حد كبير وليه شخصية وكيان مستقل وبلاش نضحك او نقلل من قدره او نتريق على طريقة كلامه , لازم نديله الاحترام الكامل ,لان الطفل بالظبط زي الاسفنجة هيكتسب شخصيته ويكونها من خلال عينيك انت , يعني لو شايفه طفل زكي هيبقى كدا , لانه بيصدقك انت , انت مرايته , فاوعى تفقده احترامه بنفسه او تفقده كرامته , الحوار يكون بشكل محترم جدا بعيدا عن أي الفاظ او كلمات جارحة .

7-7..   طريقة عقاب الطفل في طفولته المبكرة يكون عقاب بسيط بعيدا عن الحدية او التخويف يعني مثلا ممكن تجرب  (كرسي المشاغبين ), هو عبارة عن كرسي او مكان خالي من اللعب بتاعته او أي ترفيه , بتلزم الطفل يقعد عليه لمدة 5 دقايق مش اكتر لما يشاغب , بس ناخد بالنا انت تكون مديله تحذير من قبل كدا ومديله فكرة عن العقاب ده , كمان العقاب يكون في الاوضة اللي انت فيها  , اوعى توديه اوضه تانيه او تقفل عليه المكان وتسيبه لوحده , لان كدا هيخاف مش هيعدل سلوكه وتبقى بدل معدلت سلوك, عملت مشكلة تانية , بعد الخمس دقايق دول المفروض هيجي ويعتذر , طبعا كدا المشكلة خلصت لازم تسامحه و تبوسه وتاخده في حضنك .

8- 8.  زي مافيه عقاب على الافعال الغير مرغوبة , فيه مكافئة لما يعمل حاجة كويسة وتلاحظ تقدم في سلوكه , بكداه تعزز ثقته في نفسه وتحسسه بقيمة المكافئة .

طبعا دي حاجة بسيطة في التعامل مع اولادنا في طفولتهم فيه كتير موضوعات بتتكلم عن التربية وافضل الطرق للتعامل مع الاطفال هنقولها المرات القادمة ان شاء الله .